Стохка Чиллан-баттахь харцхьалелла доьзална тIе эхь даийтина аьлла, масийттазза урс тоьхна, шен йиша Евлоева Елизавета йийначу шкова Могушков Магомедбаширана ши шо лаьцна даккха хан тоьхна ГIалгIайчохь: Магасерчу кхело сацам бина цо адам дийна чIогIа оьгIазвахна аффектехь волуш аьлла.
И кхелам сацам бина хилла кхушара Товбеwа-баттахь, амма цуьнах лаьцна хиъна хIинцца. Суьдан сацамана тIе тидам бахна "гендеран ницкъ барна дуьхьал 16 де" цIе йолу информацин кампани дIахьуш йолчу "Правовая инициатива" проектан ("Правовая инициатива" арахьара агент лаьрра ю Оьрсийчоьнан Iедалша; вовшахтохаралла оцу сацамна реза яц. – Ред. билгалдаккхар.).
Оцу проектан адвокаташна хета и тайпа зуламаш дар, адамаш дайар ду аьлла, цабезам хиларан бух тIехь.
"Правовая инициатива" тобано биглалдоккху "сий лардон адамаш дайар" тахана а хуьлуш хилар а, ткъа бехке берш баккъалла а таIзар дарх кIелхьара бовлуш хилар а.
- Евлоева Елизавета нисйеллера марехь болу зударий вон лела карзахабохуш, ткъа цул тIаьхьа, шаьш яьккхинчу видеоца шантаж а еш, ахча доккхуш хиллачу бандан декъашхо Альтемирова Iийса лоцуш полицино яьккхинчу видео тIехь.
- Полицин белхахочо Холухоев Дауда социалан машанашкахь зорбане яьккхинера и видео. Холухоевна 1 шо 9 бутт хан туьйхира и зулам дарна колонехь-поселенехь даккха, амма кхел йоьдучу чохь дIахийцира иза, тоьхна хан талламан изоляторехь цо яьккхина хилар тидаме а эцна.
- Могушков Магомедбашира видео тIехь шена гина йиша йийра, ткъа цул тIаьхьа каравахара полицина, ша къера хилла тIевар аьлла кехат а кечдойтуш.
- Шинарин дийнахь, Лахьан-беттан 30-хь Дагестанехь кхело шолгIа а 2 шо хан туьйхира МВД-н хиллачу белхахочунна Велагаев Тагирана шен зуда ерна. Иштта кIеда таIзар дар а ду доьзна зулам дина хилла чIогIа оьгIазвахна аффектехь волуш, аьлла суьдхоша ларарца.