Къилбаседа ХIирийчуьра Пригород кIоштарчу Куртат йуьртахь 50 стага дакъалоцуш дов иккхина. Царех 11-мма шайна лоьрийн гIо дехна. Mash Gor телеграм-канало бахарехь, лазийначарех кхоъ Къилбаседа ХIирийчуьра ву, кхинберш - ГIалгIайчуьра. РЕН ТВ телеканалан хаамаша дийцарехь, девнан декъахойх шиъ дIалаьцна. 1994, 1999-чу шерашкахь дуьненчу бевлла кегий нах бу уьш - ший а Къилбаседа ХIирийчуьра Пригород кIоштан Камбилеевское йуьртара.
Baza телеграм-канало дийцарехь, латаран бахьана шина кхизахочун даьлла дов ду. Цига схьакхаьчначу полисхойх мел лахара а цхьаъ лазийна. Куртатехь и доккха дов хилар хьокъехь герз карахь харцхьара лелар артиклаца бехкзуламан гIуллакх долийна.
"15-й регион" порталан хаамашца аьлча, Къилбаседа ХIирийчуьра Пригород кIоштахь йукъараллера низам лардаран хьелаш чIагIдина. Меттигера ницкъахой шайн белхан чIагIдинчу хьелашка хIиттийна.
- 2021-чу шеран чакхенгахь Къилбаседа ХIирийчуьра Пригород кIоштахь гIалгIайшна, хIирийшна йуккъехь массийтта кегийри девнаш лилхира, дийцира Кавказ.Реалии сайто зенаш хиллачарех.
- 1992-чу шарахь хIирийшна, гIалгIайшна йуккъехь латта къовсар хьокъехь даьлла дов адамаш дайарца, меттигаш йохорца дирзира. Цигахь кхелхинчарех болу хаамаш тайп-тайпана бу. БархI эзарна зенаш хилла, 900 сов адам дала делла аьлла ду цкъачунна.
- "Мемориал" бакъонашаларйархойн центро хIирийн, гIалгIайн девнан бахьанаш Сталинан политикица доьзна ду элира. 1944-чу шарахь Нохч-ГIалгIайн республика дIайохийча, Пригород кIошт Къилбаседа ХIирийн АССР-на дIайаларна.
- Зазадоккху-беттан 27-на, 28-на йуккъерчу буса цабевзачара ГIалгIайчоьнна, Къилбаседа ХIирийчоьнна йуккъерчу дозанехь лаьттачу полисхошна герз диттира. Зуламхой къайлабевлира, шина полисхочунна чевнаш хилира. Охан-беттан 3-хь цабевзачара Гвардейское йуьртарчу полицин белхалошна тIелатар дира, цхьа белхало лазавира. Охан-беттан 5-нна, 6-нна йуккъерчу буса рогIера герзаца тIелатар хилира Зязиков-йуьртахь - кхо полисхо кхелхира, бархIанна чевнаш йира.
- Туркойчохь йоьдуш матч йолуш Буьри-гIаларчу "Алания" футболахойн, сербийн "Чукарички" клубан дов делира. Хьалхара тайман чакхенгахь, жамIийн терахь хийцадалале доладелира тасабалар. Серберчу тобано шайн ловзарш сацадина, стадион йитира.
- Аннексица лаьцначу ГIирмехь латар бахьана долуш дIалецира "Ахмат" СОБР-ан пхи эпсар. Царех цхьаъ вара Ибрагимов Хьасан. Нохчийчоьнан куьйгалхочо Кадыров Рамзана дукха хан йоццуш Оьрсийчоьно дIалаьцначу Украинера Херсон, Запорожье мехкашка вахийтина цуьнан векал.