ТIекхочийла долу линкаш

ЦIеххьана кхаьчна хаам!

Интерполо лехамашкара дIаваьккхина къобалъянзачу Ичкерин агIонча


Гайтаман сурт

Интерполехь дуьненаюкъарчу лехамашкара дIаваьккхина нохчийн мухIажар, иза схьавалар дехнера Оьрсийчоьно. Цунах лаьцна дуьйцу нохчийн "Вайфонд" ассоциацино (Швеци). Кехаташца а догIуш, "низамехь йоцучу герзаца вовшахкхетараллина юкъахь дакъа лацарна, низамлардаран хьукматийн белхахошна тIе куьйг дахьарна а" бехкево иза, иштта боху, низамехь доцуш герз кара а деана, цIерш туьйсуш, лелхуьйтуш даьхний хIаллакдора.

Интерполан комиссин сацамца а догIуш, цхьайолчу Европан пачхьалкхехь махкара араваккхарх ларвеш статус ю дIавоьхучун, тIаккха Оьрсийчоьно елла информаци системан регламентаца йогIуш яц, дIаяккха езаш а ю.

"Вайфонд" ассоциацехь Кавказ.Реалиин корреспонденте дийцина ма-хиллара, къобалъянзачу Нохчийн республика Ичкерин агIонча ву цара хьехориг, федералан эскаршна дуьхьал тIом бина цо "контртерроран операци" олург йоьдучу хенахь, Нохчийн шолгIа тIом, аьлла евзаш ю иза. Лоьхучун цIе йовзуьйтуш яц.

"Цуьнан цIе Интерполан йиллинчу базехь яра 2015-чу шарахь дуьйна. Хьалхо иза шозза Европера араваккха гIиртина, амма ший а эстрадицин процессаш цуьнан агIонехьа йирзира. 2017-чу шарахь мухIажар ларваран статус елира нохчочунна европхойн махкахь – тIаккха цуьнан адвокаташа къоман низамашкахула гIуллакх дира, Интерполе арз а ца деш. Цунна экстрадици йина хиллехь, иза валлалц Iазапехь латтийна хила мегара оьрсийн ницкъахоша", - дийцина ассоциацин векало.

Цо иштта билгалдаьккхина, дуьненаюкъарчу полицино наггахь бен иштта сиха жоп ца ло цхьаъ лехамашкара дIаваккхарх. Амма нохчочун йолу мухIажаран статусо гIо дина хаттар сихха листийта.

  • ТIаьххьарчу беттанашкахь Европехь митингаш хилира нохчийн зудчунна Гериханова Аминина Оьрсийчу экстрадици ярна дуьхьал, иза Румынехь дIалаьцнера, украинхойн-румынхойн дозанехь. Де хьалха Румынин полици реза ца хилира нохчийн мухIажар Гериханова Амина маьршаяккха. Хетарехь, иза миграцин набахте хьажор ю 30 денна.
  • Украинехь тIом болабелчхьана дукха нисделла Европерчу пачхьалкхашкахь бехачу нохчашна дуьхьало еш, йа депортаци еш меттигаш. Доккхачу декъанна Къилбаседа Кавказерчу бахархоша латкъамаш бо кест-кеста къоман а, динан а билгалонашца дискриминаци лелайо шайца румынхойн миграцин хьукматаша бохуш. Бакъоларъярхойн хаамашца, къаьсттина хьакхало и нохчех: йа депортаци йо царна, йа лоьцу уьш, официалехь къайлахчу сервисийн лехамашкахь бацахь а, ткъа Румынехула дехьабовлу уьш транзитехула.
  • Евробертан цхьайолчу пачхьалкхан вахархо волу нохчо дIалецира Германехь, Интерполан системехула дуьненаюкъарчу лехамашка веллера иза Оьрсийчоьнан дехарца. Товбеца-баттахь циггахь Оьрсийчоьно Интерполехула дIавехарна лецира Нохчийчуьра мухIажар. ТIаьхьо "Вайфонд" ассоциацин аьтто белира иза дуьненаюкъарчу лехамашкара дIаваккха.

Коьрта теманаш

Оха хьоьхург

XS
SM
MD
LG