Оьрсийчоьнан президенто Путин Владимира сийлаллин Орденца совгIат дина Кадырова Айманина – Нохчийчоьнан куьйгалхочун Кадыров Рамзанан нанна. Омра зорбанне даьккхина бакъонан информацин официалан порталехь.
"Жигараллица юкъараллин гIуллакх дIакхехьарна совгIат де Кадырова Айманина - регионалан юкъараллин Оьрсийчоьнан Турплахочун Кадыров Ахьмадан цIарахчу фондан президентана", - яздина ду документа тIехь.
Хьалхо сепаратистийн "ЛНР-н" куьйгалхочо Пасечник Леонида совгIат дира Нохчийчоьнан куьйгалхочун нанна а, хIусамнанна а ДоттагIаллин орденашца. Цара республика ю аьлла, дIакхайкхийначу мехкан бахархошна гуманитаран гIо латторца доьзна ду аьлла.
Охан-баттахь эксперташа тидамбира, Нохчийчуьра деана гуманитаран гIо ду бохуш, дIасадоькъу сурсаташ Украинехь дина хиларан. Bellingcat ресурсан журналисто-талламхочо Грозев Христос билгалдаккхарца, цо тоьшалла до Мариуполян бахархошна декъна кхачан сурсаташ къоладина хиларан. Цул тIаьхьа гуманитаран гIо доькъуш яьккхина видео Кадыров Рамзанан телеграм-каналера дIаяьккхира.
- Нохчийчоьнан куьйгалхочун нана а хIусамнанан а президент а, вице-президент а йолу регионалан юкъараллин Кадыров Ахьмадан цIарах йолчу фондана масийттаза критика йира, бюджетан белхахошкара бертаза ахчанаш цу юкъа дахкийтарна. Цул совнах, зорбанан гIирсаша хаамбора фонде ахчанаш кхачар а, дохкар а цIена дац аьлла, Кадыровн "альтернативан казна" ю олура иза.
- Американ Цхьаьнатоьхначу Штатийн финансийн министраллин санкцийн тептарехь ю Кадыровн цIарах фонд "Магнитсикйн глобалан актан" буха тIехь.
- 2021-чу шарахь Кадыров Ахьмадан цIарахчу фондо деклараци тIехь гайтира хилла нолан ял а, юкъара хилла пайда а. 2019-чу шарахь фонде, цуьнан урхаллахоша бахарехь, 6 миллиард сом (цул хьалха 2,2 миллиард) кхаьчнехь, тIаьххьарчу шина шарахь гойту цахилар. Фондо зорбане даьхначу зерашца, Iалашонан хьашташна харж йина яц цо. Бовзийтина хаамаш "тамашен" бу коммерцица йоьзна йоцчу организацина элира эксперташа.
