Дукха хан йоццуш ницкъахоша рейдаш дIахьош лечкъийначех цхьаъ тIехь Iазапаш хьегийтинчул тIаьхьа Нохчийчохь полисхойн декъехь валарх хаамбина оппозицин блогеро Абдурахманом Тумсос а, иштта 1ADAT, NIYSO телеграм-каналаша а; кхечу хьасташа и хаам тIечIагIбина бац.
Кадыров Рамзанан критикийн информацица, велларг – 1994-чу шарера Шела гIалара вахархо Магомадов Iабдулла ву. Ток йеттийтина лараш тIехь цуьнан дакъа стигалкъекъа-беттан 18-чохь гергарчаьрга дIаделла, дог сецнера цуьнан аьлла. Тезет хIотторна тIехь а латтош терго хиллера кадыровхоша, чIагIдо оппозиционераша. Церае хаамашца, Магомедов заьIапхо а хилла.
Масех иттаннашкахь Нохчийчуьра бахархой лечкъорах хьалхо адамийн бакъонаш Iалашъйечу "Мемориал" Центро тIечIагIбира хаамаш, цунах лаьцна кхин а хьалха дийцинера оппозицин телеграм-каналаша. Бахьана дара, дийцарехь, вевзаш воцчо "Дустум" тIейаздина "Лада-Нива" машен йагош йаржийна видео. "Дустум" цIе лелийна Кадыров Рамзана цхьана заманчохь, хIинца цуьнан кIанта Адама лелош йу и.
- Лахьан-баттахь нохчийн ницкъахоша рейд дIайаьхьира Дагестанан дозана уллорчу Гуьмса кIоштара Къеди-Эвлахь. Иттанашкахь кегийнах лийцира цигахь, операци дIахьочу меттигехь тидам хилира гIагI диллинчу техникан. Чоьхьарчу гIуллакхийн министралло цхьана а кепара комментарий ца йира оцу информацих лаьцна.
- Стохка дечкен-баттахь Iалхан-ГIалахь дуккха а нах лецарх дийца даьккхира дечкен-беттан 9-чохь, хIетахь хаамбора, цхьахйолчу къайлахчу набахти чохь уьш латтош хила тарло бохуш. ТIаьхьо "Мемориало" тIечIагIдира дечкен-беттан ворхIолгIачу буса 25 гергга стаг лачкъийна вигар. Хетарехь, лечкъийнарш Соьлжа-ГIала дIабигинера, цигахь цхьана къайлахчу набахтехь латтийнера уьш. Лачкъийначарлахь вара СолсаевгIеран ши ваша – Леча а, Хьамзат а, царна тIехь а къизаллаш лелийна хиллера. Вежарех хилларг хууш дац, ши бутт баьллачул тIаьхьа даге лазар иккхина велира церан да.
- Нохчийчоьнан куьйгалхочо Кадыров Рамзана чIагIдо, республикехь къайлах набахтеш йац бохуш. Доккхачу декъанна цо дIахьедира, шен цIийнан дозана тIехь бакъо йоцуш лецна нах латтон лармаш йац аьлла. Оппозицин блогеро Янгулбаев ИбрахIима дийцинера муха йу къайлах набахте, иштта далхийра Кадыровс а дакъалацарах гIело латтош.
