Кадыровхоша шайн штаб санна лелош хиллачу школана тIе Украинан тIеман ницкъаша тохар дарна 40 гергга стаг вийна, 100 гергга лазийна. Цунах лаьцна дуьйцу украинхойн а, нохчийн оппозицин а телеграмерчу каналаша, амма ВСУ-н официалан чоьтехь цхьа а хаамаш бац.
Тохар дича дийнабиссина нах гойтуш яьккхина видео арахийцира "УНИАН" телеграмерчу каналехь, и хила тарло Херсонан кIоштан Каиры эвлахь.
"Ищи своих" укринхойн телеграм-канало дийцарехь, 40 стаг вийна, кхин 60-на чевнаш йина. ТIаьхьо нохчийн оппозицин Niyso телеграм-каналехь дIахьедира, лазийнарш 100 стаге кхачалц хила мега, аьлла.
1ADAT оппозицин телеграм-каналехь яздарехь, уьш шех "Нефтеполк" олучун эскархой бу – Нохчийчуьрчу Росгвардин хадаран Урхаллин мехкадаьттан а, газан а объекташ ларъеш йолу полицин полк ю иза. Видео тIехь байъина хила мегачу нехан суьрташ гойту, иштта аудиохаам хозуьйту. Цу тIехь дийнависсинчух цхьамма боху, "Хаймарс" ракетица дина и тохар.
Иштта нохчийн оппозицин каналаша социалан машанашкара а, мессенджерашкара а скриншоташ гойту оцу тохарх лаьцна, иштта байъинчу нахах лаьцна а. Иза баккъала а хилар тIечIагIдан аьтто бац.
- Украинехь байъинчу 140 Нохчийчуьрчу бахархойн цIерш евза Кавказ.Реалиина – официалехь бохучул а масийттаза дукха ду иза.
- Украина Iалашъечу, шайн лаамехь вовшахкхеттачу Дудаев ДжовхIаран цIарахчу нохчийн батальонан командиро Осмаев Адама Кавказ.Реалиина зазадокхзу-баттахь тIечIагIдира, нохчийн дакъойх заградотрядех санна пайдаоьцуш хиларх. Цо дийцарехь, оьрсийн эскарна каракхаьчначу дозанашкахь лела уьш, тIемаш боьлхучу аренашкахь дIасауьду тIеман министраллин кхечу дакъойн эскархой а сецабо кадыровхоша.
