Нохчийчоьнан куьйгалхочун Кадыров Рамзанан белхан кабинетехь 175 эзар сом доьхуш болу боксан "груша" хаабелла – иза гучубаьлла ЧГТРК "Грозный" телехьожийлан репортажехь.
ГIадужу-беттан 2-хь арахецначу хаамашкахь стратегин инициативан Агеталлин коьртачу куьйгалхочуьнца Чупшева Светланица Кадыровн вовшахкхетарх лаьцна репортаж гайтира. Цхьанакхетарехь дакъалецира Нохчийчоьнан урхаллан куьйгалхочо Хучиев Муслима а, кхечу хьаькамаша а. Инвестицин климатан къоман рейтингехь Нохчийчоьнан меттигех а, Украинерчу тIамехь дакъалоцучу эскархойн доьзалшна социалан гIо латторах а хеттарш дийцаре дира цара.
Нохчийчоьнан куьйгалхочун кабинетехь хилира цхьанакхетар, диссинчул сов, боксерийн грушица кечйина йара и чоь. Louis Vuitton компанино Лагерфельд Карлаца цхьана 2014-чу шарахь кхоьллина йара оцу гIирсан дозатоьхна коллекци – ерриг арахецнарг йара 25 комплект. Ша "груша" боцург, цуьнан гIутакх, боксан каранаш, куз а бу комплектехь. T журналан хаамашца (модех лаьцна дуьйцуш The New York Times-н дакъа ду иза), 175 эзар доллар бу цуьнан мах.
Кадыров Рамзанан кабинетерчу "грушина" тIе тидам бахийтина "Новая газетан" журналиста Милашина Еленас.
- Стратегийн инициативан агенталла – иза автономан коммерцехь йоцу цхьанатохаралла ю. Экономикан а, социалан а сферашкахь коьрта проекташ хьалхататтархьама, совдегаралла кхиорхьама, корматалле белхахой кхиорхьама кхоьллина ю иза Оьрсийчоьнан урхалло.
- Кадыров Рамзана стигалкъекъа-баттахь хIоттийначу шен йоьIан кертахь яьккхинчу видео тIехь гуш ю уьйтIахь дIахIоттийна Lamborghini Urus машен, иза яц хьаькамо официалехь чуеллачу деклараци тIехь. Цуьнан мах 220 эзар доллар бу.
- Охан-баттахь оппозицин политикан Навальный Алексейн тобано фильм арахийцира, Кадыров Рамзанан сахьтийн коллекцех лаьцна – церан вовшахтоьхна мах 500 миллион сом бу.
- ТIеман юьххьехь Кадыров Рамзанан тергойира Соьлжа-ГIалахь дIахIиттийначу эскархошлахь 125 эзар сом мах болу Prada мачаш йоьхна. ХIетахь политико дIахьедира, церан мах шена ца хаьара – йишин кIанта совгIатна еанера уьш аьлла.
- Кадыров Рамзанан долахь тоьлла вилла ю Дубайхь. ГIарбаьллачу пальман куцехь боьттинчу гIайранна тIехь ю иза, Zabeel Saray Royal Residences at Palm Jumeirah цIе йолчу отелан юкъайогIуш ю иза 2I номерца. Юккъерчу барамахь оцу тайпа лулара виллаш цхьана денна аренде оьцург кхоъ эзар доллар гергга мах бу (долара хIусам оьцуш цунах боьху мах буьйцуш бац). Кадыровн вилла – оцу отелехь уггар йоккхачех цхьаъ ю, дуьйцу "Украинская правда" ресурсан талламехь.
