Москварчу полицино лаьцна Нохчийчуьра вахархо Денисултанов Артур (изза ву Курмакаев Артур а, "Динго" а), "Кадыров Рамзанан долара киллер" санна вевзаш ву иза. Полисхошна хетарехь, и стаг бехке ву 37 миллион соьманна курхалла лелорна, цуьнан хIусаме хьежна талламхой, хаамбо ТАСС агенталло шен хьостанна тIе а тевжаш.
Де хьалха 26 шо долу Москван вахархо веанера полицин декъе, цо дийцина, соьмех валюта эца шен лаам хиларх – вевзачо брокерна Прохоров Вадимна тIе гIо аьлла хиллера. Церан вовшахкхетар хилира Зазадоккху-беттан 14-хь Сбербанкан декъана хьалха – кхечу стага ахча схьа а эцна, банкехь хийца а хийцина, долларшкахь юхалур ду аьлла хиллера Прохоровс. Зен хиллачо "брокере" 37 миллион сом чохь долу тIоьрмаг дIабелла хиллера, ткъа цул тIаьхьа и стаг тIепаза вайна.
Оцу гIуллакхехула масех де даьлча лецира Денисултанов – хIусаме хьоьжуш нуьцкъахоша кара а дина схьаийцира 6,5 миллион сом.
Хьалхо Денисултанов Дудаев ДжовхIаран цIарах йолчу нохчийн батальонан командирана Осмаев Адамна тIелатарна бехкевира. Осмаевна а, цуьнан хIусамнанна Аминина а тIелатар динера 2017-чу шеран Мангалан-беттан 1-чу дийнахь. Денисултановс ша журналист ву аьлла, тIаккха юха и шиъ ден гIоьртира, амма Окуева кхиира киллерна чов а йина, цуьнан гIора дайъа.
- Денисултановс Украинерчу СИЗО-хь шиъ-ах шо даьккхира кхелан сацаме хьоьжуш. Амма Оьрсийчоьнан аьтто белира иза хийцарца барт бан – иза хилале кхо де дисча, тIелеттачунна тIера бехкаш дIадехира.
- Денисултанов шозза кхеле озийна вара: 1998-чу шарахь стаг лачкъорна а, 2000-чу шарахь – курхалла лелорна а, стаг лачкъорна а, ахчанаш дахарна а, Iедалан белхалочунна ницкъ барна а, харц кехаташ дахарна а бехке вина.