Нохчийн оппозицин блогер Абдурахманов Тумсо вийна хила мега къобалйанзачу Ичкерин урхаллин куьйгалхочо Закаев Ахьмада, аьлла дIахьедира ЧГТРК "Грозный" телехьожийлан директоро Ахмадов Чингиза.
Закаевс куьйгалла деш йолу ЧРИ-н урхалла низамехь йац бохуш Абдурахмановс дина хиллачу дIахьедаршца доьзна цо и, амма цхьа а тоьшаллаш ца далийна. Делахь а, Абдурахманов дукха шерашкахь дуьйна Кадыров Рамзанан критик ву, республикан парламентан спикеро Даудов Мохьмада чIир кхайкхийнера цунна, республикан куьйгалхочун дех лаьцна дешнаш аларна.
Лахьан-баттахь Абдурахмановс "Нохчийчоьнан Аз" политикан парти кхолларца доьзна хила мега и вийна боху хаамаш, аьлла хета Ахмадовна.
"И хиллачул тIаьхьа кхо кIира даьлча Закаевс шен агIончийн гулам цхьанатуьйхира, цигахь Закаевн берриг критикаш низамехь боцуш лерира", - дIахьедира нохчийн пачхьалкхан телеканалан куьйгалхочо, иштта билгалдаьккхира, Закаевс кIирнахь реакци ца йора Абдурахманов вийна бохучу хаамашна.
ЧРИ-н урхаллин арахьарчу премьеро Ахмадовн дешнашна комментари ца йина. ГIуран-беттан 6-хь "Киев" телеканалана интервью йелира цо, цигахь элира, Абдурахмановн лелар вуно лазаме ду Кадыровна а, цуьнан гонна а, шайн аьтто хилча, кадыровхошка и "дIаваккхалур вара" аьлла цо. Закаевс дагадаийтира, Абдурахманов Оьрсийчуьра дIавахара, Нохчийчоьнан куьйгалхочун гергарчу стагаца дов даьллачул тIаьхьа.
Швецихь Абдурахманов Тумсо вийна аьлла тIечIагIбаза хаам гучубелира къобалйазчу Ичкерин цхьахйолчу телеграм-каналан агIонехь гIуран-беттан 1-чохь. Цул тIаьхьа, гIуран-беттан 5-хь Кадыровн критик верах лаьцна дуьйцура 1ADAT телеграм-канало а, иштта и хаам арахийцира нохчийн диаспоран хьалханчех цхьаъ волчу Масхадов Анзора. Кавказ.Реаллино дахьийтинчу кехатна деллачу официалерчу жоьпехь Швецин полицино тIе ца чIагIбира, йа харц ца бира Абдурахманов верах лаьцна хаамаш.
- 2020-чу шеран чиллан-баттахь кIело йира Абдурахманов Тумсона Швецехь цуьнан петар чохь. 36 шо долчу блогерна коьртах жIов тоьхнера, амма цуьнан аьтто хиллера тIелеттачуьнгара и схьа а йаьккхина, полици кхайкха. ТIаьхьо киллеро Мамаев Руслана кхетийра, дуьххьара ша блогерна тIехь тидам латто безаш вара, амма "Соьлжа-ГIаларчу наха" шена 50 эзар евро хьехча и ве реза хилира ша аьлла. Кхелехь прокуроро а билгалдаьккхира, "ларша Соьлжа-ГIала вуьгу". ТIелатар дарехула сацам 2021-чу шеран дечкен-баттахь хилира. Мамаевна итт шо хан туьйхира, цуьнца цхьана хиллачу Шапиаева Эльмирина – бархI.
- Гезгмашин-беттан 27-хь 30 гергга герзаца болу нах Йоккхачу АтагIа баьхкира Абдурахмановн гергарчу нахе. Царна ультиматум хIоттийра: блогеран дIахьедарш цара ца хийцахь, царна чIир кхайкхор йу аьлла. Цул а цхьа де хьалха Абдурахмановца хиллачу телеграмерчу чатехь Нохчийчоьнан парламентан куьйгалхо Даудов Мохьмад зIене велира. Жигархочунна кхерамаш тийсира цо, цуьнан дешнех цуьнан гергарчу нахе жоп долуьйтур ду аьлла дош делира.
- 2019-чу шарахь Даудовс блогерна Абдурахманов Тумсона чIир кхайкхийра. Кадыров Ахьмад-хьаьжан иэсе цабезам бу шен, и къоман йамартхо хета шена аьлла Абдурахмановс динчу дIахьедаршна дуьхьал тийсина бара и кхерамаш.
- Оьрсийчоьнан арахьа бехачу Кадыровн критикашна масийттаза дира т1елатарш. 2019-чу шеран марсхьокху-баттахь Берлинехь вийра Масхадов Асланан а, Басаев Шемалан а тIемало Хангошвили Зеламха. 2017-чу шеран гезгмашин-баттахь Киевехь йийра нохчо йолу Окуева Амина. И хиллачул т1аьхьа масех де даьлча Киевехь эккхийтира Гуьржийчоьнан вахархо, нохчо Махаури Тимур. 2009-чу шеран дечкен-баттахь Венехь герз диттина вийра Кадыровн хилла волу хадархо Исраилов Iумар. 2004-чу шеран чиллан-баттахь Къатарехь эккхийтира Ичкерин президентан декхарш кхочушдеш хилла волу Яндарбиев Зеламха.
