Американ Цхьаьнатоьхначу Штатийн финансийн министралло "Iаьржачу тептаре" йазйина Кадыров Ахьмадан цIарах гIоьналлин фондан куьйгаллехь йолу Нохчийчоьнан урхалхочун нана Кадырова Аймани. Оцу тептарехь бу Американ бахархошна а, резиденташна а бизнес лелон дихкина нах.
Иштта санкцеш йаьхна Нохчийчоьнан премьер-министрна Хучиев Муслимна а, омбудсменна Солтаев Мансурна а, "Ахмат" полицин полкан командирна Чалаев Замидна а, Ростовн кIоштара берийн бакъонаш Iалашйан векал йинчу Черкасова Иринина а дуьхьал.
Цул совнах, тептаре йаьккхина аннекси йинчу ГIирмера берийн "Артек" садоIийла а, кхин а Оьрсийчоьнан а, Украинан а пхи вахархо а.
Марсхьокху-беттан 24-чохь Украинехь даздира йозуш цахиларан де. КIайчу цIийнан сайтехь США-н президентан Джо Байденан цIарах зорбане даьккхинчу декъалдарехь дIахаийтина Украинера нуьцкъаша бераш арадаьхначу нахана дуьхьал керла санкцеш йаьхна аьлла, билгалдаьккхина Свобода Радионо.
- 2022-чу шеран гезгамашин-баттахь Американ Цхьаьнатоьхначу Штатийн финансийн министралло санкцеш дуьхьалйехира Кадыров Рамзанна а, цуьнан зударшна Меднина а, шолгIа хIусамнана лоручу Хазуева Фатимина а, кхоалгIа зуда ю бохучу Ахмадова Аминина а. Иштта Нохчийчоьнан куьйгалхочун йоIаршна Кадырова Iайшатана а, культурин министран даржехь йолчу, Каринина (Хадижат), школазхойн департаментан хьаькам йолчу, Табарикна а, хIетахь латтанан а, бахаман а министр хиллачу, карарчу хенахь кхерамзаллин кхеташонан секретарь волчу шичина Ибрагимов Турпал-Iелина а дуьхьал. Цул совнах, санкцеш туьйхира "Фирадаус" модан цIенна а, иза диллинарг лоруш йу Кадырова Iайшат.
- 2017-чу шеран гIуран-баттахь Американ финансийн министралло Нохчийчоьнан куьйгалхо ваьккхира санкцийн «Магнитскийн тептаре». Урхалло цунна тIехь дитира кхел йоцуш нах байъарх, Iазапаш хьегийтарх, дуьненан юкъаралло тIеэцна кхин йолу адамийн бакъонаш хьешарх а жоьпалла. 2020-чу шарахь Американ Пачхьалкхан департаменто шорйира Кадыровна тоьхна санкцеш, цуьнан зудчух Медних а, йоьIарех Iайшатах а, Хадижатах а хьакхайолуьйтуш.
- Американ Iедалхоша "Ахмат" футболан клуб а, Кадыров Ахьмадан цIарах йолу Фонд а, латархойн "Ахмат" клуб а "Магнитскийн глобалан актан" буха тIехь долчу санкцийн тептаре йехира 2020-чу шеран гIуран-баттахь. Адамийн бакъонаш талхочу нахана дуьхьал долийна ду и тептар Вашингтоно.
- Мангал-беттахь Черкасова Иринина дуьхьал санкцеш йехира Евроберто. Иза а, Оьрсийчоьнан цхьа могIа кхин а хьаькамаш а бехке лору цара, низамехь йоцу депортаци йарна украинхойн берашна.
- Кадыров Рамзанна а, цуьнан доьзалхошна а, нохчийн лаккхарчу даржхошна а дуьхьал хьалхо санкцеш кхайкхийра Украино, Евроберто, Японино, Керла Зеландино, Канадо.
