ТIекхочийла долу линкаш

ЦIеххьана кхаьчна хаам!

Шпионан гIирс а эцна, мила вохка кечлуш хилла нохчийн пенсионер?...


Бакъонца а доцуш, информаци гулъяр дихкина ду Оьрсийчохь. И бахьана долуш информаци гулйон гIирсех пайда эцар а дихкина ду цигахь. Амма махкал арахьа маьрша юхкуш йолу цхьацца коьчаллаш а, ладугIу а, сурт доккху а гIирсаш оьцу Оьрсийчурча бахархоша, иза мегаш доций а ца хууш.

ДIабаханчу Дечкен-баттахь цхьана интернетан сайтехула къайлаха къамелашка ладугIу гIирс эцна хилла 64 долчу пенсионеро, Соьлж-ГIалара вахархочо Турлаев Дардас (цIе хийцина ю).

eBay олу йохка-эцаран сайт
eBay олу йохка-эцаран сайт

Даханчу кIиранах почте вахана хилла иза шена схьатесна гIирс схьаэца.

Цигахь песнионер дIалаьцна Федералан кхерамазаллан сервисан белхахоша.

Цецваьллачу воккхачу стагана оцу минотехь а бен ца хиина ша эцнарг шпионийн гIирс хилар.

ХIинца и пенсионер бехке ларахь цунна 4 шо хан тоха мегаш ю суьдо набахтехь яккха.

Цу тайпаниг дуьххьара хуьлуш дац Нохчийчохь. Стохка изза къайлаха ладугIу гIирс эцна аьлла, ши шо ах шо хан туьйхира Соьлж-ГIаларчу кхело меттигерчу вахархочунна Виситаев Висханна.

Виситаевна бехке диллинарг а дара, бакъо а йоцуш, къайлаха ладугIу гIирс эцар.

И тайпа гIирс лелор зулам лоруш ду Оьрсийчохь, иза бакъо а йоцуш информаци гулъян аьтто луш болун дела.

Иштта 2016-чу шарахь Соьлж-ГIалахь Нохчийчоьнан Лаккхарчу Суьдан суьдхочуьнан Мовлаева Табарикан кабинета чохь карийнера къамелаш къайлаха дIаяздеш болу гIирс.

Иза цига хIоттийна хиллера суьдан белхахочо.

Нохчийчоьнан Лаккхара суд
Нохчийчоьнан Лаккхара суд

Ши-кхо шо хьалха Новочеркасскерчу вахархочо Матвиенко Евгенийс, цхьацца хIума оьцуш хаза а елла, интернетехула эцна хиллера тIехь видеокамера йолу ручка.

Китайра яийтина шен посылка схьаоьцуш иза почтехь дIалецира ФСБ-н белхахоша.

350 сом доккху ручка эцарна арахь яккха хан кхайкхийра Матвиенкона. Дуьххьара шеца йинарг забар ю моьттуш хиллера и стаг. Амма говзанчаша сацам бинера цо эцна ручка шпионийн гIирс бу аьлла. Ткъа суьдхоша цо динарг лерира зулам.

Кху тIаьхьарчу шерашкахь иттаннаш нах чубоьхкина Оьрсийчохь цхьацца жима видеокамераш а, микрофонаш а тIехь йолу гIирсаш эцарна. Делахь а цу гIуллакхо ца хийцина уьш эца луучу нехан лаам.

Кхин цхьа а хIума а ду кхузахь. Кхеташ дац, цу кепара гIирсаш эцар а, лелор а дихкина хIунда ду, оццу Iалашонашна лело аьтто болуш хIорангахь а ю ала мегар долу кхузаманахьлера телефонаш хилча.

XS
SM
MD
LG