Казахстанан 14-та регионехь юхадьккхина терроран "критикан кхераман" тIегIа хилар. Цунах лаьцна хаам бо республикан къоман кхерамазаллин Комитето. Ша аьлча, юьйцург ю мехкан коьрта гIала Нур-Султан а, ткъа иштта Шымкент а. Кхаа регионехь – Алматыхь а, Алматын а, Жамбылан а кIошташ дуьсуш ду кхераме хьал. Цигахь хIинца а дIахьуш ду "террорхой а, кхидолу къепедацарш хилча зуламаш лелийна нах а".
Дечкен-беттан 12-хь Казахстанерчу зорбан гIирсаша хаам бира, талораш дарехь а, тасадаларшкахь а дакъалаьцна хила мега аьлла шеко йолуш кхин 1700 стаг лаьцна хиларх. Цу кепара, махкахь ницкъабар эккхарца доьзна лецначийн терахь ду 10 эзар гергга стаг. Казахстанан инарлин прокуратуро леррина сайт кхоьллина, цигахь бахархойн аьтто бу къепедарш хуьлуш яьхна видеош а, суьрташ а дIахIитто, анониман кепара.
Дечкен-беттан 2-хь Казахстанан Мангистау областерчу Жанаозен гIалахь дуьхьалонан акцеш юьйлаелира, цIеххьана газан мехаш тIетохарна дуьхьал. Дечкен-беттан 4-хь дуьхьалонан акцеша лецира ерриг а аьлча санна мехкан яккхийн гIаланаш. Церан декъашхоша экономикан дехаршца цхьаьна дIакхайкхийра политикан дехарш. Iедалша дIахьедира газан мехаш охьадаьхна хиларх лаьцна. Дечкен-беттан 5-чу Iуьйранна Токаев Касым-Жомарта дIасахийцира министрийн кабинет, амма цо ца совцийра демонстранташ.
Юкъарчу кхерамзаллин бертан организацино (ОДКБ) эскарш кхайкхира Казахстане президента Токаев Касым-Жомарта.
Ерриг а Казахстанехула даьржинчу тийсадаларан а, къепедацаран а эпицентр хилира шинарийн дийнахь дуьххьара ницкъаллин структурийн белхахойн а, дуьхьалонан акцийн декъашхойн а тасадаларш хилла Алма-Ата. Кхаарин дийнахь цигахь, дIа а лаьцна, ягийра гIалан администрацин а, прокуратуран а гIишлош.
Дечкен-беттан 11-хь Токаевс дIакхайкхийра ОДКБ-н мисси дIайирзина хиларх лаьцна. Тахана, еарин дийнахь, арадаха долийна эскарш.
Оьрсийчоьнан тIеман министралло бинчу хаамца, ОДКБ-н ницкъаша мехала йолчу объекташна ха дар дIалуш ду Казахстанан органашка, кечдеш ду эскарш а, техника а Оьрсийчоьнан теман-транспортан авиацин кеманашна тIеяккхар, даиман а шаьш туп тоьхначу меттигашка уьш дIакхачо.
Хьалхо хаам бинера, эскарш а, техника а араяккха иттех да оьшур ду аьлла.