Соьлжа-ГIалара а, Гелдганара а зударий лецна Нохчийчохь полисхоша, бозбанчалла лелош хилла аьлла, бехкебина. Пачхьалкхан "Грозный" телеканало сюжет гайтина, исламан медицинан Центран куьйгалхочо Эльжуркаев Адама а, ницкъхоша а юьхь йохуш телехьожийле балийначу зударшкара.
"Кхара бахарехь, адамийн дог-ойланийн урхалла далуш хилла кхьарга, аьтто, ирс хуьлуьйтуш, иштта кхин дIа а. Амма, и дерриг а ахчанах", - яздина публикацин коьртехь.
Видео тIехь корреспонденто чIагIдо, лаьцна балийначу зударех цхьаммо "хи а, тIулгаш а лехьош хилла езачу меттигашкара", шолгIачо "туьха чохь тIоьрмигаш лулахойн керташка туьйсуш хилла", ткъа кхозлагIниг - "шен арсеналехь дуккха а безаман дарбанаш долуш хилла" бохуш.
"Уьш берриш а гучубаьхна "Юг" батальонан бIаьхоша, Соьлжа-ГIаларчу чоьхьарчу гIуллакхийн министраллан урхаллин белхахошца юкъахь", - боху сюжетехь.
ХIумахуурш" Iорабахар дуккхазза а хьехийна Нохчийчуьрчу Iедало 2021-чу шеран Дечкен-баттахь а, Чиллан-баттахь а, дерриг а 2020-чу шарахь а. Палтасархой лецар долийра масех шо хьалха. Лецнарш дукха хьолехь видеокамерашна хьалха къера хуьлу шаьш харцо лелийна бохучунна.
"Терроризмал а, наркоманел а кхераме" ду цара дийриг, олий гойту уьш дукха хьолехь. Исламо зуламе лоруш хиларца а дузуш, лецна палтийсархой, «хIумахуурш», седа-жайна хьуьйсурш дуккхаза а гайтина махкарчу телевизионо. Церан юьхьйохург хIоразза а хуьлу Эльжуркаев Адам.
Оцу юкъанна билгалдаккха догIу, Кадыров Ахьмадан цIарахчу Фондо латтош йолчу исламан медицинан Центрехь иштта жинаш лоьхкуш, халкъан дарбанаш леладо. Оцу Центран куьйгалхо ву Эльжуркаев Адам.