Соьлжа-ГIалара Висаитовн кIоштан кхелехь дIайаьхьна Волгоградера студенто Журавель Никитас КъорIан дагорах пхоьалгIа вовшахтоьхна кхеташо, цигахь къамелаш дина волайнхой ду шаьш аьлла дIахьединчу нохчийн пхеа имамо. Цара аьлла, "боллу бусалбачу нехан сина доккха зен дарх" а, шаьш "хиллачунна тIехула сагатдарх" а.
Бехкбуьллучех волчу Турбина поселкера маьждиган имама Горшуев Хьасана КъорIан дагор "сийсазварал а деза ду" элира, цо дIахьедира, телеграм-каналашкахь йаьржина видеоролик бахьана долуш ден цIийн таIам лакхабаьллера, хаамбина йоьдучу кхелера нохчийн зорбанан гIирсаша.
"Доккха сина зен дарх" иштта тоьшалла дира Автотрест поселкера маьждиган имамо Тасуев Iийсас а. Соьлжа-ГIалара Шейх-Мансуран кIоштара маьждиган имамо Барзукаев Аптис элира Журавеля динчо "муьлхха а лартIахь волу стаг" сийсазво. Цхьаммо а ца хьахийра оцу йукъанна Журавель ша динчунна докховаьлла хилар а, Исламан дин довза а, Iамо а цуьнан лаам хилар, хьалхо мехкан урхалхочун кIанта Кадыров Адама цунна йиттина хилар.
Оцу гIуллакхехула волайнарш бу аьлла билгалваьккхина ву 13 имам, кхелан кхеташо масийттаза дIататта дийзира, уьш цига ца бахкарна. Кхелан тоххара хиллачу ладегIаршкахь видеозIенехуоа хеттарш дира – Волгоградера маьждиган имаме Бектемиров Ильясе а, VI.ru сайтан корреспонденте Богданов Иване а.
- КъорIан дагийна аьллачу шеконашца Журавель Никита лецира стигалкъекъа-беттан 21-хь. Талламан комитетан пресс-гIуллакххоша дIахьедира, лаьцначо мукIарло дина, СБУ-на лерина тIеман гIишлойн суьрташ дохуш вара ша аьлла. Журавеля дина дIахьедар доцург, мича тоьшаллаш тIехь гIуллакх вовшахтоьхна, хууш дац.
- Талламан комитетан куьйгалхочун Бастрыкин Александран тIедилларца, гIуллакх билггал Нохчийчу дIаделира – цигара "дуккха а" дехарш кхочура, шаьш зен хилларш лара оцу гIуллакхехула аьлла бух балош.
- Кадыров Адама марсхьокху-беттан I5-чохь йиттира КъорIан дагорна Соьлжа-ГIалара СИЗОхь лаьцна латточу Журавель Никитина. Полицино дуьхьало йира бехктакхаман гIуллакх долон, Адаман жоьпалле озон хан тIекхаьчна йац аьлла. Цул тIаьхьа Нохчийчоьнан куьйгалхочун кIантана ворхI совгIат дира: йуьхьанца республикин "турпалхо" вира цунах, цул тIаьхьа ГIезалойчоьнан а, Кхарачой-Чергазийчоьнан а, ГIебарта Балкхаройчоьнан а совгIаташ делира, цул совнах, "Умматана хьалха гIуллакхаш дарна" I-чу бараман орденца а, иштта нохчийн "Даймехкан сий" орден а йелира. Цхьадолу билгалдаьхна совгIаташ дала хан йолуш а вац иза.
- Кхелехь Журавель Никитас шен гечдар дийхира бусалбанашка, цо дIахьедира, ша бехке хета шена бусалбанашна деза хета жайна дагорна, амма шога къепе йохо цхьана а агIор бахьана дацара шен аьлла. Цо иштта тIетуьйхира, КъорIан дагон ша барт бина нах ца карийра шена, ткъа и зулам дина ша итт эзар соьман дуьхьа, иза а дала а ца делира шена аьлла.
