ГIалгIайчуьрчу Сунжа кIоштан Мужече эвлахь иккхина дов дирзина ши стаг вуьйш, герз кхийсарца.
Вийна ший а – 1985 -чу а, 1986-чу а шерашкара – ДалиевгIеран тайпанах ву, хаамбо "Интерфакс" агенталло, шайн хьастана тIетевжина.
Полицина къастарехь, Балаев Юсупна а, цуьнан шина кIантана а, байинчу ДалиевгIарна а юкъахь дов дара латта къуьйсуш. Уьш берриш а вовшийн гергара бу.
"Хьалхо бинчу хаамца, луларчу ДалиевгIра оцу лаьттан декъа тIе латта доьхкинийла хиъна Балаев Юсуп а, цуьнан кIентий а дуьхьало ян гIоьртинера, дов герзашаца къастон буьйлира, оцу кхийсаршкахь ДалиевгIарех волчу цхьаммо герз даьккхинера, Балаев Юсупна тIе а хьажош. И гинчу Юсупан кIанта автомат йиттинера шайн дуьхьалончашна", - далийна агенталло бакъоларъяран органашкарчу шайн хьостан дешнаш.
Цул тIаьхьа оцу меттигера дIабаханера герз диттинарш. Стаг верца доьзна бехктакхаман гIуллакх долийна. Зуламхой лехамашка белла.
ТIаьхьо махкарчу чоьхьарчу гIуллакхийн министраллан пресс-гIуллакххоша агенталле хаамбира, конфликтна цхьахволу декъашхо лаьцна аьлла.
КIирандийнан суьйранна Москварчу хенаца 18:00 сахьт даьллачу заманчохь ГIалгIайчуьрчу Талламан комитетан урхаллин сайта тIехь хаам бу хиллачух лаьцна, амма шекоерш лецарх информаци яц.
ГIуран-бутт бовш Нохчийчуьрчу а, ГIалгIайчуьрчу а шина вахархочунна юкъахь герз а даьккхина, летарш хиллера Назранан кIоштарчу федералан некъа тIехь. Бахьана дара некъаца хилла конфликт – микроавтобусчохь воьдучу Нохчийчуьрчу вахархочо ГIалгIайчуьра машенлелорхочунна новкъарло йина бохура, цунна некъ ца буьтуш.
Гезгамашин-баттахь Назранан кIоштарчу ГIази-юьртахь дов даьллера КостовегIеран а, КациевгIеран а тайпанах долчу берийн. Оцу девнна юкъагIоьртинера баккхийнаш. КостоевгIеран доьзалера волчо таллархойн топ йиттинера, чевнаш йира КациевгIеран доьзалера масех стагана. Дарбанан цIийне кхачийра уьш. Цхьахволчун ког дIабаьккхира.
