Дагестанан вахархо Селимханов ИбрахIим Москвахь лачкъийна, Нохчийчу дIавигна хилла. Бакъоларъярхойх лаьцна цуьнга дийцийта Iалашонца вигнера иза, яздо "Медиазоно" "Оьрсийчоьнан ЛГБТ-машана" тIетевжина.
Москварчу "Новогиреево" метрон социйлана уллехь могIарерчу бахархойн духарехь, нохчийн маттахь къамел ден виъ стаг тIевеанера Стигалкъекъа-беттан 15-чохь Селимхановна. Цуьнгара кехаташ схьадаьхнера цара, Внуково аэропортехь Соьлжа-ГIала доьдучу кемана а хаийна, цигарчу полисхойн каравеллера. Кавказерчу ЛГБТ-н векалшна гIо дечу "Оьрсийчоьнан ЛГБТ-машанах" лаьцна информаци хиттинера цуьнга.
Цхьа хан яьлча Соьлжа-ГIаларчу Селимханов ненахошка дIавеллера, цигахь латтош хиллера иза полисхойн хаддазчу тергонехь. ХIетте а цуьнан кадаьллера ведда, Москва дIаваха. Полице латкъам бина цо, ша лачкъорна.
- Дуьненчуьрчу 29 пачхьалкхо карладаьккхина Оьрсийчоьнан Iедалхошна, Нохчийчоьнан дозана тIехь ЛГБТ-чу нахана тIаьхьабевлла леларна таллам тIедожор. 2018-чу шарахь Европехь кхерамазаллин а, цхьаьнабелхан а вовшахтохараллан (OSCE) эксперто дина хьесапаш ду кхузахь дуьйцурш. Цунна карийнера Нохчийчохь лелочу кхин долчу дуккха а бакъонаш хьешарца, "тIаьхьа-хьалха ЛГБТ-н векалшна дуьхьал дохучу зуламех гуш долу тоьшаллаш" а.
