Хьалхо Нохчийчоьнан куьйгалхочо Кадыров Рамзана дIахьедар динера, шаьш юхадовлуш дац 2018-чу шарахь хир йолчу футболан дуьненан чемпионатан цхьадолу ловзарш Нохчийн республикехь хила деза бохучу лаамах аьлла.
Амма Оьрсийчоьнан вице-премьер, Оьрсийчоьнан Футболан кхеташонан президент Мутко Виталий иза хуьлийла дац аьлла хеташ ву.
Журналисташа цу хьокъехь шега деллачу хаттарна жоп луш цо иштта элира цунах лаьцна: «Ца хаьа суна, муха тIеэца деза цу республикехь футболан дуьненан чемпионатан матч хила еза боху Кадыровн дешнаш. Цуьнга хаттийша, соьга хIунда хоьтту аш иза?
2010-чу шарахь ГIура-беттан 10-чу дийнахь = дукха хан йоццуш юбилей хилира - ФИФА-н кхочушдон комитето сацам бира дуьненан чемпионат Оьрсийчура 11-тта гIалахь дIаяхьа. И гIаланаш ю кхечлуш ерш».
Кхечу агIор муха хир ду иза, ша кхеташ вац, бохуш вара Мутко Виталий: «Иза далур долуш дац. Амма Нохчийчоь юкъатоьхна ю чемпионатана кечам бечу программана. Оха аьтто бина церан цхьа тоба тIеэца, иза ехар йолу база санна иза (Нохчийчоь) билгал а яьккхина. Оха кечйеш 64 база ю. 32 футболан тоба дIатарйина хир ю цигахь. Нагахь цигахь (Нохчийчохь) цхьа тоба дIанислахь, тхо дуьхьал хир дац".
2018-чу шеран Футболан дуьненан чемпионатан матчаш хир ю Мангал-беттан 14-чу дийнахь дуьйна Товбеца-беттан 15-гIачу дийне кхаччалц Оьрсийчура 11 гIаларчу 12 стадионехь.
Цу гIаланашна юкъахь ю Москох, Петарбух, Казан, Лахара Новгород, Саранск, Калининград, Волгоград, Екатеринбург, Самара, Сочи, Ростох.
“Маршо Радион” доттагIий, шун аьтто бу тхан Facebook-ерчу аккаунтах пайда а оьцуш, тхан дискуссехь дакъалаца. Шун комменташна модераци ян эшарна, уьш сайтехь жимма тIаьхьо гучуевр ю. Нагахь санна тхоьга яийта шайн видео а, аудио а материалаш елахь, шун аьтто бу иза кху телефонца WhatsApp-e я Viber-e схьаяийта: 420 724 019832