ТIекхочийла долу линкаш

100 гергга къомах, ахбIе миллион гергга болчу буддисташа байа болийнарш пачхьалкхехь 4 процент бен а боцу бусалбанаш-рохинджаш байа шаьш аралилхича, цара шайн 26 шо долу зуда йийна, бохуш даржадора. Ткъа талламаш бинчу дуьненаюкъарчу бусалбанийн боламаша, иза бакъдац, рохинджаш сийсазбеш пропаганда ю, иза дуккха хьалха дуьйна а лела, бохура.

«Рохинджаш бирмахой бац орамашца, къайлах Бангладешера баьхкина нах бу, хIаллакбе уьш!» - олий даржош дара питана. Иштта 4 шо хьалха дестаделира дов Мьянмехь.

ЦIий Iенна дуккха а, Iеначуьраца сецна хIинца а. Рохинджа юьртара юьрта ваха а, Мьянмин паспорт а карахь вахархо ларалуш а, цхьа а даман йолу бакъо йолуш а вац. Иза бохург дац ша и къам, ю Цхьанакхеттачу Къаьмнийн Дуьненаюкъара Организаци. Шо шен рапорташкахь кху шерашкахь дуккхаза а хазийна рохинджа къам таханенна Лаьтта тIехь уггаре а кIиза бала ловчу къаьмнех ду, аьлла.

Делахь а, ца леккъа уьш хIаллакбар, церан зударий хьийзор, цIенош церан дагор. Цу тIе, Мьянмехь рахинджа вийнера олий стагга а вац чувуллуш, лоцуш.

Мелла а хан яра бусалбанаша рохинджашна сагатде. Амма деш дацара цхьа а гIо-накъосталла я дуьненаюкъарчу хьукматаша а, я политикаша а, я къаьмнаша а.

…Оцу юкъанна бара хIара хаам. «Со кхушаренна сайна балхахь йогIучу мукъаханна Малайзерчу Лангкави гIайритIе садаIа ваха дагахь вара. …Амма сан идилли йохий Мьянмера оцу сан Лангкави боьлху пекъарш-рохинджаш хинкеманчохь, Малайзе а ца буьтуш, юха а бахана бала а ца лууш, бисина, аьлла, хезначу хаамо. И къам девзича, наб яй сан. ...Иштта хийцаели Iалашо».

Иза кху кIирандийнахь яздина шен Фесбукехь цо – ткъа иза вайна массарна а вевзаш стаг ву – Москохара адвокат Мусаев Мурад.

Мурад кху муьрехь Мьянмехь рохинджашна дуьненан низам хьоьхуш, нахана, уьш гул а беш, ца бала хIун дан догIу дуьйцуш лела. Цо бакъо елира Маршо Радионна ша а, шеца болчу кхечу вайнаха а даьхначу суьртех пайдаэца. Амма хан ца карийра кху юкъанна вайца къамеле вала.

Къамел оха дира, Мурад а санна, Европехь вуно дукха нахана а, мехкашна а бевзачу вайнахана а, кхечу мискачу нахана а сагIадечу Салсабил-юкъараллан декъашхошца. Аьлча а, церан цIарх вистхилира куьйгалхо Хьамзат.

Цо довзийтира Мьянмехь хIинцца шайна гуш долу сурт.

КIира доккхур ду Мусаев Мурада а, салсабилхоша а Мьянмехь, цIарна я кепана а дац цара арадаьккхинарг – иза а, вуьйш а дика бевза шаьш дечу мелечу гIуллакхашца а, адамах дог лазарца а.

Дац иза церан, шаьш Мьянмерчу буддисташна хьекъал лур ду, бусалбанаш цигара Iазапах хьалхабохур бу, бохург. Амма бу цаьргахь и лаам.

Вац иттех стаг, уьш мел диканашца гоьбевлла белахь а, Мьянмера харцо саццол. Ткъа иштанаш бIеннашкахь хилча, эзарнашкахь хилча, шаьш багахь дечу къамелехь харцо ловш мел воцург орцахваьлча?

Бац дера рохинджеш-м миллион а. Ткъа уьш боллучохь битича, нохчашна гина, тахана ниIмат хьогург оцу шегарчу зовкхах вала сахьт а доцийла…

Хьомсара “Маршо Радион”доттагIий, шун аьтто бу тхан Facebook-ерчу аккаунтах пайда а оьцуш, тхан дискуссехь дакъалаца. Шун комменташна модераци ян эшарна, уьш сайтехь жимма тIаьхьо гучуевр ю. Нагахь санна тхоьга яийта шайн видео а, аудио а материалаш елахь, шун аьтто бу иза кху телефонца WhatsApp-e я Viber-e схьатаса: 420 724 019832

XS
SM
MD
LG