ТIекхочийла долу линкаш

ЦIеххьана кхаьчна хаам!

Нохчийчохь кхиазхой къайлабевллачул тIаьхьа школашкахь дешархойн телефонаш талла буьйлабелла


Нохчийчуьра школа, гайтаман сурт
Нохчийчуьра школа, гайтаман сурт

Нохчийчуьра школашкахь дешаран министраллин векалш берийн телефонашка хьийса буьйлабелла. Дешархойн девайсаш чохь лоьху "эхь-бехк" дохийна билгалонаш, хаамбина регионера йозуш йоцчу кхаа хьасто. Церан дийцаршца, дешархоша дина йозанаш доьшу, суьрташка а, стикершка а хьуьйсу мессенджерашкара.

"Сан кIант ву иссолгIачу классехь доьшуш, цара шога цуьнан телефон теллина хиллера. Цхьа жоьжахати ю=кх хIара. Оха телефон дIацIанйина тхайн ма-хуьллу, тхайчаьрга дIа а хаийтира", - дийцина Соьлжа-ГIаларчу цхьахволчу дешархочун нанас (цуьнан цIе йоккхуш йац кхерамзлла ларйеш).

Къамелдинчо дийцарехь, телефонаш чу хьийсар доьзна хила тарло дечкен-беттан 25-чохь ши кхиазхо варца. Дагестанерчу МВД-н урхалло хаамбора, тайп-тайпанчу хеначохь цIера араваьлла Нохчийчуьра 13 шераш долу ши вахархо лоьхуш хиларх. ШолгIачу дийнахь полисхошна схьакарийра ши кIант ХIинжа-гIалахь, цигахь петар лаьцна хиллера цу шиммо.

Кхечу хьастан хаамашца, телефонаш Соьлжа-ГIаларчу школашкахь теллина ца Iаш, толлуш ю мехкан кхечу кIошташкахь а. Цо а дузу иза тIаьххьарчу заманчохь Нохчийчохь ши кхиазхо къайлаваларца.

Нохчийчуьра дешаран министраллин сайтехь бина хаам бац школашкахь рейдаш дIайахьарх. Урхалло иштта йина комментарий йац дешархойн телефонаш чу хьийсарх лаьцначу информацих.

  • Хьалхо хаамбира Росгвардин резервхошна а, ГИБДД-н белхахошна а юкъахь Хьалха-Мартанахь хиллачу конфликтан тешаш хила тарлучу нехан телефонаш листарх.
  • Нохчийчуьра Эвтарахь хиллачу "Горный ключ" пионерийн лагерех база йан гIерта мехкан урхалхочуьнца Кадыров Рамзанца а, Оьрсийчоьнан берийн омбудсменан Львова-Белова Мариян а юкъахь йолийна проект кхочушйархьама аьлла, дIакхайкхийра. "Паторитикехь кхетош-кхион" пачхьалкхан кхечу регионашкара бераш дара цига далош.
  • 2019-чу шарера 2021-чу шаре кхаччалц Нохчийчохь тIепаза вайна 4984 стаг. Москва а, Москван кIошт а санначу йаккхийчу гIаланашкахь долчу хьолаца дуьстича дукха лахара дац и терахь. Байна нах наггахь бен карош боцчу регионашлахь а лидер ю Нохчийчоь.

Оха хьоьхург

XS
SM
MD
LG