Нохчийчуьра эскархоша тIеман база хьош, 12,6 млн соьмана къола дина махкахь куп тоьхначу цхьахдолчу тIеман декъехь. Цу гIуллакхехь жоьпе озийнарш бара: бедарийн хьулмин хьаькам Попов Ивана а, салтийн барзакъ латточу белхан сервисан куьйгалхо Кротиков Петра а. Соьлжа-гIалан гарнизонан тIеман кхело йукъарчу рожехь даккха цхьа 1,5 шо, 2 шо хенаш туьйхира царна.
Талламхоша дийцарехь, 2021-чу шеран гIуран-баттахь дуьйна 2022-чу шеран мангалан-беттан 23-чу дийне кхаччалц Попов шена дIадахьа хIума вовшахтухуш хилла- герз а, тIеман бедарш а. Цхьа а тайпа новкъарло йоцуш и дерриге хIума базан кертара арадоккхуш хилла. Ткъа Кротиков - цунна гIодеш.
Эскархойн машенашкахь кех мел даьккхинарг церан кхечу накъосташа - къолахойн тобано доьхкина, боху талламо.
Хилла зе 12,6 млн р. эскархоша меттахIоттийна аьлла ду кхелан сацамашкахь. Бехкечарна хенаш тоьхна, амма цкъачунна уьш чубоьхкина бац. Кхелехь шайн къовса таро а йу церан.
Краснодаран гарнизонан тIеман кхело бехке лерира эскархо Николай Пивоваров. Авиабомбанна оьшу 5 детонатор йухкуш дIалаьцна ву иза. Набахтехь йаккха 3,5 шо хан а тоьхна цунна.
Ростовера къилбехьарчу кIоштан тIеман кхело Толстов Никитина луьрачу рожехь йаккха 8 шо хан кхайкхира. Герз лачкъош, оьцуш, лелош, духкуш гучуваларна.
Ростовера къилбехьарчу кIоштан тIеман кхелотеллира йолахочун Фоменко Егоран гIуллакх. Иза а бехке лерира - тIеман герз эцарехь а, леладарехь а. Эскархочо и герз Украинера деана аьлла билгалдаьккина ду цуьнан гIуллакхехь. Набахтехь йаккха 2 шо, 7 бутт хан тухуш, чувоьллира и.
