Нохчийчоьнан Курчлойн кIоштехула йолчу полицин декъан куьйгалхочунна, Кадыровн накъостана Агуев Рустамна Доьналлин орден йелла. Дайначу шеран дечкен-баттахь Американ санкцеш йехира цунна дуьхьал, ЯнгулбаевгIеран доьзалан коьртеш даха бохуш цо дIахьедарш дарна.
Агуевна совгIат даларх шен телеграм-каналехь дийцира Кадыров Рамзана. Цул сов, "Ахмат-Грозный" ОМОН-н буьйранчана Бисаев Анзорна а йелла Доьналлин орден, дийцина республикан куьйгалхочо. Президентан сайтехь бац Агуевна, Бисаевна совгIаташ даларх хаамаш – кху шеран товбеца-баттахь уьш сайте хIиттош бац.
2022 шеран зазадоккху-баттахь Американ финансийн министралло санкцийн тептаре ваьккхира Агуев, Нохчийчохь адамийн бакъонаш хьешарна. Бакъоларйархошна хетарехь, Курчлойн кIоштан РОВД-н куьйгалхо америкхойн Iедало тидаме лецира, Европехь бехачу махкахошка ЯнгулбаевгIеран доьзалхойн коьртеш тIерадаха бохуш цо дIахьедича. Кадыровн Iедална критика йечу 1ADAT телеграм-каналаца и доьзал боьзна хета Нохчийчуьрчу Iедална.
Агуевс куьйгалла дечу Курчлойн кIоштарчу РОВД-н белхахо гунахь ву элира талламо, 2009 шеран товбеца-баттахь оьрсийн бакъоларйархо, журналист Эстемирова Наталья лачкъорна а, йерна а. 2017 шеран дечкен-баттахь Курчлойн кIоштан вейтта вахархо низамехь доцуш лаьцна латтийра оцу полицин декъехь: Европерчу адамийн бакъошашкахула йолчу кхелехь цара дийцира, шаьш Iазапехь латторах, сексуалан кепехь сийзаллаш лелор йу бохуш кхерамаш тийсарх а – герз лелорна а, низамехь йоцу герзаца цхьанакхеталлехь дакъа лаьцарна а къера хилар тIедожош.
"Йукъараллин къепе ларйарехь са ца кхоийначу, стогалла, майралла гайтинчу" бахархошна луш йу Доьналлин орден. Зуламхошна дуьхьало латторна, чолхечу хьолехь нах кIелхьарабахарна а луш йу иза иштта.
- Кхерамаш тийсича шен йоIаца Алияца Оьрсийчуьра дIавахара Янгулбаев Сайди. Янгулбаев ИбрахIим а, Байсангур а дIавахна оцу махкара 2018-чу шарахь. Янгулбаев Абубакар пачхьалкхера араваьлла 2021-шеран гIуран-баттахь.
- Курчлойн кIоштехула йолчу РОВД куьйгалхочо камерина хьалха дов дира меттигерчу бахархошна, низамаш хедорна, меттигерчу Iедална хетарехь, ламасташца доцуш леларна а. Масала, низамаш хедочийн машенаш схьа а йахий, уьш урамашка нораш хьекха арабахар тIедожийра цо.
- Шен даьхний дажа дахийта аьтто ца болу шен аьлла дIахьедина волчу стеган йуьхь йаьхна 2021 шарахь Агуевс – ворхI беран да баркал ала декхара вара республикан куьйгалхочунна, и даьхний шен хиларна, аьлла Агуевс. 2022 шарахь зуда йалочехь герз кхуьйсуш болу Нохчийчуьра бахархой Украинерчу тIаме хьийсор тIедожийра полисхойн хьаькамо.
