Нохчийн юкъараллин "Халкъан болам 1АДАТ" вовшахтохаралла, оппозицин 1АДАТ телеграм-канал аьлча дика евзаш йолу, йихкинчу экстремистийн организацийн реестре язйина. Хьалхо Нохчийчуьрчу Лакхарчу кхело лерира иза экстремизме.
Дечкен-баттахь Соьлжа-ГIаларчу Заводской кIоштан кхело телеграмера масех публикаци экстремистийн ю аьлла, билгалъяьккхира – оцу искаца хIетахь вистхилира Нохчийчоьнан прокуроран гIовс, махкара Роскомнадзор а, юстицин министралла а, адамийн бакъонаш Iалашъян векал винарг а юкъа а валош. Жоп дала дезарг цхьаьна а воцуш листира гIуллакх – цуьнан метта тIеозийра нохчийн омбудсмен Нухажиев Нурди, амма иза а кхеле ца веара.
ТIаьхьо экстремистийн ю аьлла, дIакхайкхийра йоллу юкъаралла, боламан векало Янгулбаев ИбрахIима хIетахь дIахьедира, оцу сацамца 1ААДАТ къийсалур яц, хIунда аьлча, боламо "террорхошца дийцарш ца до" аьлла.
2020-чу шарахь болх болийна оппозицин 1АДАТ боламо, Нохчийчуьрчу бахархошна хаамаш дIакхачон а, церан бакъонаш ларъян а Iалашонца. Хаамаш гулбеш, тексташ язъеш, видеороликаш йохуш, бакъоларъяран болх беш проектан командехь 30 сов стаг ву. Масала, тахана боламо дIаяздеш ду Украинан дозана тIехь кадыровхоша лелочух а.
- Жигархо Янгулбаев ИбрахIим- бакъоларъярхочун Янгулбаев Абубакаран ваша а, полисхочунна тIелетта аьлла, бехкейинчу Мусаева Заремин а кIант а ву – Охан-баттахь къайлах лелаш волчуьра гучуваьллачу цо дийцира, 1АДАТ оппозицин боламца шен йолчу уьйрех. Болам кхоьллинчех а, цуьнан куьйгалхойх а цхьаъ ву иза
- Лахьан-баттахь Роскомнадзоро Оьрсийчоьнан территори тIехь дIакъевлира оппозицин 1АДАТ боламан интернет-ресурсийн цхьа дакъа, Заводской кIоштан кхелан сацаман буха тIехь. Блок тохаран бахьанех лерира Нохчийчоьнан прокуроран гIовса "зуламе Кадыровн режим" аьлла, зорбане хIоттийна материал.
