Ростовн кӀоштарчу Донецк гӀалахь ФСБ-н белхахоша лаьцна меттигера йахархо, Оьрсийчоьнан эскарех лаьцна информаци Украинан Кхерамзаллин сервисе дӀакхачорна шеконаш хилла. Цу хьокъехь пачхьалкхана йамартло йарна гӀуллакх долийна.
Лацарх хаам бина "Коммерсант - Юг Оьрсийчоь" гIирсо, регионерчу урхаллина тӀе а тевжаш. Кхерамзаллин векалша дийцарехь, зазадокху-баттахь цу зудчо Украинан лерринчу сервисе информаци йелла, "тӀеман инфраструктуран коьртачу гIишлона даккхий зенаш дан тарлуш йолу". Схьадийцарехь, Украинан агӀоно дош делла хилла боху цунна, и дийриг шайн пачхьалкха йуьтур йу, пачхьалкхалла а лур ду аьлла.
ФСБ-но цхьа а тӀечӀагӀдар ца дина шен версина. СБУ-на дӀайелла бохучу информацина тIекхача муха аьтто баьлла зудчун, билгалдаьккхина дац. Лоцуш йаьккхина, Don Mash телеграм-канало йаржийначу оперативан видео тӀехь цуьнан юьхь къайлайаккхина йу, цӀе а йоккхуш йац.
"I1РнД" зорбанан гӀирсо, хьостанна тӀе а тевжаш, хаам бо "лаьцнарг 35 шо долу болх беш йоцу, жимачу шина беран нана йу бохуш. Цуьнан гергарчех цхьаъ Украинан ТIеман ницкъашкахь болх беш ву, бIастенан йуьххехь цуьнан петарехь талламаш дӀабаьхьна а хиллера.
- Марсахьокху-баттахь Ростов-на-Дону гӀалара ФСБ-н оперативан белхахоша лаьцнера Къилбаседа тӀеман эскаран белхахо. Цунах шеко хиллера, пачхьалкхана йамартйаьлла аьлла – Iедалан версица, лаьцначо къайлах информаци дӀакхачийна Украинан тӀеман къайлахчу сервисийн векалшка.
- Товбеца-баттахь ФСБ-но дIакхайкхира Ростов-кӀоштан вахархочо пачхьалкхана йамартло йина хилла, оцу шеконашца лаьцна хиларх. Иза "Украинан лерринчу сервисийн агент" ву аьлла, лаьцначун цӀе хууш яц.
- КӀира хьалха ФСБ-н регионерчу урхалло хаам бира Дон-тӀерачу Ростов-гӀалин вахархо лацарх, Оьрсийчоьнан эскаран меттигах информаци Украинан агӀонна дӀасакхехьийтарх шеко йолуш. Цунна дуьхьал а долийна пачхьалкхана йамартло йарх гӀуллакх.
- Стохка Оьрсийчоьнан кхелашка кхаьчна 63 бехктакхаман гӀуллакх, пачхьалкхана йамартло йарна – иза историхь лаккхара терахь ду аьлла, хьесап дина бакъонашларъяран "Первый отдел" организацино. Цу тайпачу гӀуллакхашкахула ладегӀарш къевлинчу неӀаршкахь дӀахьо, журналисташ дакъалоцуш а боцуш. Ткъа бехкебечийн цӀераш йовзуьйтуш ца хуьлу дукха хьолахь, боху бакъонашларъярхоша.
