Украинера Сумской кIоштара Рыжевка эвла схьайаьккхина аьлла дIахьедина Нохчийчоьнан урхалхочо Кадыров Рамзана – меттигерчу Iедалхоша стигалкъекъа-баттахь бехира, эвакуаци йинчул тIаьхьа цигахь ворхI стаг висина, украинхойн эскархой цигахь бан а бац аьлла.
"Лерринчцу Iалашонца тIелетарш дечу заманчохь украинхойн агIор баккхий эшамаш хилла, церан йухабовла дезна тIаккха. Бертахь, тайна доллу дакъойн эскархоша бина болх бахьана долуш йурт схьайаккха ницкъ кхаьчна кхаа дийнахь кхин дIоггара халонаш йоцуш", - дIахьедина Кадыровс шен телеграм-кааналехь.
Оцу постаца цхьана хIоттийна видео йу, цу тIехь тIеман министраллин "Ахмат-Чечня" полка йукъара эскархоша герзаш детта гIишлона а, хьуьнан асана а – билггал маца, стенгахь и видео йаьккхина йу, хууш дац.
Курскан кIоштаца дозанехь йу Рыжевка эвла, оьрсийн Теткино эвлаца йукъахь урам а бу цигахь, 2001-чу шарахь динчу лаларшца, цигахь вехаш вара 857 стаг. 2022-чу шарахь Украинана тIелеттачул тIаьхьа украинхойн хьасташа масийттаза билгалдаьккхира, и эвла "сира зона" йу аьлла – цигахь эскархой бац, амма цуьнан дозана тIе кест-кеста Оьрсийчоьнан талламхойн дакъош догIу аьллера. Изза тIечIагIдира "Дождь" телеканалан эфирехь мангал-беттан 10-чохь Conflict Intelligence Team тоба кхоьллинчу Левиев Руслана.
Рыжевкера бахархой арабьхначул тIаьхьа цигахь 7 стаг виссинера аьлла, дийцира украинхойн "Суспiльне" хьасте Белополье гIалин куьйгалхочун гIовса Видуев Владимира кху шеран стигалкъекъа-беттан 22-чохь.
- Кадыровхой Украинехь гIарабевлира "тикток-эскарш" аьлла: тIеман эксперташна а, тешашна а хетарехь, нохчийн салтий Оьрсийчоьно схьайаьхначу территореш тIехь бу. Цигахь цара роликаш йоху йохийначу гIишлошна йукъахула герзаш детташ а лелаш, маьрша нах "кIелхьарбоху" шаьш бохуш. Америкахойн "ТIом зуьйчу Институто"(ISW) чIагIдора, нохчийн тобанаша тIемашкахь башха дакъалоцуш дац, дукха хьолхаь уьш тылехь Iа аьлла. Цунах лацна дуьйцура иштта Украинехьа тIемаш бечу Къилбаседа Кавказера бахархоша а.
- Стохка стигалкъекъа-баттахь дийца даьккхира тIеман министраллин "Ахмат-Россия", "Ахмат-Чечня" полкаш вовшахтохарх, ткъа церан шайн автопарк хиларх хаийтира Кадыровс лахьан-баттахь. 2024-чу шеран йуьххьехь динчу хьесапашца, "Ахмат" тобано дина гIуллакхаш гучудевлла дац, вагнеровхойшна рекрутинг йар доцург, билгалдаьккхира возуш воцчу тIеман аналитико Михайлов Кирилла.
- "Крокус Сити Холлехь" теракт йинчул тIаьхьа совгIаташ декъна нохчийн "Ахмат-Россия" полкан эскархошна – тIелатар динарш бу боху нах лоьцуш накъосталла дарна билгалбаьхна уьш. Билггал кадыровхоша цу операцихь хIун дакъа лаьцна хууш дац, ткъа тIеман министралло хьаххане ца хьахадо Путин Владимиран сурт тIехь шевронаш лелон "Ахмат" дакъа. Оцу полках лаьцна хууш хIун ду, стенца доьзна ду цунна совгIат дар, къастийра Кавказ.Реалии сайто.
