ГIалгIайчохь хиллачу протесташна тIехула лецначу жигархойн рогIера кхеташо дIаяьхьна Кисловодскерчу кхело Ессентукехь. Тешех цхьахволчо (прессехь цIераш йохуш яц цхьаболчийн – редакцин билгалдаккхар.), полицин хиллачу белхахочо аьлла кхеле, Нохчийчоьнца дозанашца хиллачу бертана дуьхьал Магасехь хIоттийначу митингехь провокаторшлахь бара хIетахь мехкан урхалхо лаьттинчу Евкуров Юнус-Бекан хадархой аьлла.
Адвокате Куриев Джабраиле тешо, экс-полисхочо кхелехь дийцина, провокаторшлахь шена вовзарх оцу заманчохь республикан куьйгалхо хиллачу Евкуров Юнус-Бекан хадархой бевзира шена аьлла. Адвокато дийцина, митингехь яьхна керла видеош толлуш бу кхелахой аьлла.
Цхьана видео тIехь гуш ду, бехкебечаьргахьа тоьшалла деш волу гIудалкх чохь волу заьIапхо Дударкиев Адам митингхой а, Росгварин белхахой а вовшах ца латийта хьийзаш.
"Суьдехь цо бахара: "ХIара агIо а, важа агIо а дIатеян гIертара со. Вайн берашна тIе мохь хьоькхура ас, кхо ша юхадовла бохуш. Ткъа Росгвардин белхахой мелхо а гергаоьхура оццул". Цара провокаци йира", - дийцина Куриевс.
Питана деш бакъоларъяран органаша серло а тухуш, гIовгIа йоккхучу гранатех пайдаийцира аьлла, тоьшаллаш далийна тешаша митинган жигархошна тIетовш.
Росгвардин белхахойх болчу тешаша хьалхо дийцира кхелехь, "чхьонкар а ма лелайе" аьлла, шайга дина омра хиларх. Ткъа, адвоката бахарехь, цара чхьонкарш лелийна хилар а, првокацеш ярх а тоьшаллаш до видеоша.
- "ГIалгIайн бехктакхаман гIулллакхехула" бехке бийраш дуьхьалонан акцеш еш бара Нохчийчоьнна а, ГIалгIайчоьна а юкъара доза нийса билгалдаьккхина дац бохуш. 2019-чу шарахь Зазадоккху-беттан 23-хь Магасехь хилла митинг дIайирзира ОМОН-ца а, Росгвардица а тасадаларш а хуьлуш.
- Хьалхо бакъонашларъяран "Мемориал" центро (Оьрсийчоьнан Iедало "Мемориал" яьккхина арахьарчу агентийн статусе, амма "Мемориал" къера ца хилла цунна – ред.билгалдаккхар) политикан тутмакхаш бу аьлла, дIакхайкхира гIалгIайн оцу дуьхьалонан акцешна хьлахабевлла лелларш.
