Украинан президенто Зеленский Владимира официалехь тергойина, 25 эзар куьйг гулдина Ичкерин суверенитет къобалъярх петицин. Низамехь оццул кхаж вовшахкхеттехь пачхьалкхан куьйгалхо хьажа декхаре ву цуьнга.
Президентан интернет-векалтан электронан петицийн порталехь зорбане даьккхина жоп. Цу тIехь Зеленский тIетевжина Лакхарчу Радехь Нохчийчоь ханна оккупаци йина мохк хилар тIечIагIдеш, "нохчийн къоман геноцид" емалдеш тIеэцначу сацамна, цо карладаьккхина, Украинан Конституцица а догIуш, арахьара пачхьалкхаш къобалъяр перзидентан бакъо ю аьлла. Иштта билгалдоккху деллачу жоьпехь, пачхьалкхан арахьарчу гIуллакхийн министраллан а компетенци арахьара пачхьалкхаш тIеэцар а, цаьрца дипломатин юкъаметтигаш нисъяр а.
Зеленскийс тIедиллина МИД-на, петици тIехь хьахийна хаттар компетенцин гурашкахь листар а, цуьнца доьзна хетарг шега схьакхачор а.
- Денош хьалха къобалъязчу Нохчийн республикан Ичкериян арахьарчу Iедалан премьер-министро Закаев Ахьмада тIедожийра Украинана, Дагестанан суверенитет тIелаца аьлла. Пачхьалкхан субъекташ дIакъасторах дийцарш дарна Оьрсийчохь бехкзуламан жоьпалла ду тIедожош.
- ГIадужу-беттан 18-чохь Нохчийчоьнан Ичкерия республика Оьрсийчоьно ханна оккупаци йина территори лоруш, "нохчийн къомана дина геноцид" емалдеш, сацам тIеийцира Украинан Лакхарчу Радехь. Кхаж теснера 287 депутато.
- ГIадужу-беттан 19-чохь Украинан президенте Нохчийн Ичкерия руспубликин суверенитет тIеэцар доьхуш, хьажийначу петицино 25 эзар кхаж гулбинера. Марсхьокху-беттан 15-чохь пачхьалкхан президентан интернет векалтан официалан сайте хIоттийнера петици, цуьнан автор вара украинхойн политик, журналист Гармаш Сергей.
- Хьалхо ООН-н кхерамзаллин Кхеташонан гуламехь охан-беттан 5-чохь вистхуьлуш Украинан президенто Зеленский Владимира дIахьедира, Оьрсийчоьно "халкъан а, динан а башхалла" хIаллакъеш дIахьочу политико дIайоху "шина континентера иттанашкахь сов къаьмнийн паргIато, шайна ма-хетта даха йолу бакъо".
- ТIаьххьарчу беттанашкахь Украинан территори Iалашйо иштта нохчийн лаамхойн батальонаша а цхьаьна. Церан могIаршкахь – даймохк дIатесна тIе ца эцначу Ичкерин агIончаш а бу. Стигалкъекъа-баттахь Киеверчу политикашца цхьаьнакхийтира Ичкерин арахьарчу Iедалан премьер-министр Закаев Ахьмад, ткъа Лакхарчу Радан депутато Гончаренко Алексейс юкъадаьккхира чергазашна динарг геноцид а, Ичкерин суверенитет а къобалдар. Оцу юкъанна президентан Зеленскийн офисо массарна а хезаш реакци йина яцара юкъахь къахьегарх. Карточкашка хьаьжча, ший а низаман проект хIинца а листина яц комитеташа.
