ТIекхочийла долу линкаш

ЦIеххьана кхаьчна хаам!

Ютубо блок тоьхна Украинан президентах пароди еш яьккхинчу Кадыров Рамзанан видеонна


Нохчийчоьнан куьйгалхо Кадыров Рамзан

Ютюб видеохостинго блок тоьхна Украинан президентах Зеленский Владимирах лаьцна пароди еш яьккхинчу кхаа видеох цхьанна – цу чохь дакъа лаьцнера Нохчийчоьнан куьйгалхочо Кадыров Рамзана а, блогера Комикадзе Максо а. Авторийн бакъонаш хедор хилла иза дIаяккхаран бахьана.

Блогерна кхаьчна йолу скрин-шотаца а догIуш (шен телеграмерчу канале хIоттийна цо иза), Евгений Панюта цIарца вазвина волчу пайдаэцархочо кховдийна бакъонаш хьешарна латкъам. Видеон дуьххьарчу секундашкахь бакъонаш хедор гина социалан машанна – блогеро дIахьедо, уьш видеостокехь эцна хилла хилар, тIаккха царах пайда эцар низамца догIуш хилар а.

Украинан президент аьшнаш веш, беламе видео Кадыров Рамзанан телеграмерчу каналехь товбеца-беттан юьххьехь гучуелира. Хьалхарчу видео тIехь Зеленскийн вастехь волчу актеро "Украинан билламза капитуляцин актана" кIел куьйг яздо, оцу хенахь цуьнан белшаш тIехь Кадыровн куьйг хуьлу. ШолгIачунна тIаьхь – йийсаре а волий, Соьлжа-ГIаларчу резиденце вогIу иза, ша "Ахмат" батальоне дIаэцар доьхуш, кхозлагIчу видео тIахь – Iалашонна меттана гойту иза кадыровхоша герз кхуьйсучу меттехь, видеон чакхенгахь йоза хуьлу "тIаьхье хир ю кхин дIа".

Санкт-Петербургера блогер Комикадзе Макс ву 148 эзар стаг тIевазвелла шен ютьюбера канал лелош. ТIом болабелча схьадиллина цо иза. Ша Зеленский Владимирах тера хиларх пайда оьцу блогеро – президентах пародеш йоху, оцу вастехь чат-рулетка чу а волий, бевзаш боцчу нахаца къамел до политикан озаца. Амма комик гIарвелира интернетан арахьарчу сегментехь – цуьнан цхьайолчу пародех жоп дала дезна испанхойн зорбанашна хьалха Словакин полисхойн.

Комикадзе цхьаъ хилла ца Iа видеош йохуш дакъа лаца кхайкхиначех – цига кхайкхира бевзаш болу пранкераш Лексус а (Столяров Алексей), Вован а (Кузнецов Владимир а). Цара муха дакъа лаьцна а, муха барт бина балийнера уьш республике а – балхах ахча кхаьчний царна, мичара, муьлхачу барамехь кхаьчна – хууш дац.

  • Кадыров Ахьмадан цIарахчу регионерчу юкъараллин фондо сепаратистийн "ДНР-ра" 26 берана а, кхиазхочунна а, оцу тобанца хилла волчу кхаанна а IPhone I3 PRO Max телефонаш елира. Уьш цига кхаьчнера Нохчийн пачхьалкхан хьехархойн университетан базехь хIоттийна йолчу дешаран сменехь дакъа лаца. Ишттачу смартфонан туькнара мах 150 эзар гергга сом бу.
  • Хьалхо оцу баттахь Кадыров Ахьмадан цIарахчу регионалан фондо Украине тIом бан хьежош болу пачхьалкхан йоллу регионашкара шайх лаамхой олурш кIиранчохь чекхбуьйлучу Гуьмсерчу спецназан университетана лерина ТР-301 кема ("кукурузник" санна девзаш долу Ан-2 кеманан модификаци ю иза) эцнера. Билггал муха пайдаоьцур бу кеманах - хууш дац.

Коьрта теманаш

Оха хьоьхург

XS
SM
MD
LG