Юкъарчу хIусамера бертаза араяьккхина ша аьлла, Iедалхошка арздинчу Магерамова Малида нохчийн телевизионан эфирехь шена гечдар дехна. Цуьнан гергарчарна тIедиллина, тховкIелонца йолу цуьнан проблемаш ерзор.
Ноьвран-кIоштарчу яхархочух сюжет гайтира "Грозный" телеканалан керлачу хаамийн программехь оршотдийнахь. Мобилан телефонца яьккхинчу видео тIехь Магерамовас латкъамбо, Соьлжа-ГIаларчу юкъарчу хIусамера ша араяккхарна.
"Сайн хIусамчуьра араяьккхина со ши кIира а ду учахь хиина Iаш йолу", - боху зудчо. Телесюжетан авторша дуьйцу, 2011-чу шарахь дуьйна гIаличуьрчу юкъарчу хIусамехь ехаш яра иза, амма кхелан сацамца цу чуьра араяьккхина хиллера бохуш.
Маршо Радионо яздира, дахначу шеран ГIадужу-баттахь мехкан куьйгалхочо Кадыров Рамзана хьаькамашна тIедилларх, юкъарчу Iойленашкахь талламаш а бай, маьхза хIусамашка сатуьйсучийн тептаршкара оцу гIишло чохь хила йиш йоцурш арабаха аьлла.
Цо бахарехь, тахана Соьлжа-ГIалахь тховкIело йоьхучу 19800 стагах 20 эзар аферисташ бу. Оццу дийнахь дIадолийра Соьлжа-ГIалара а, Гуьмсера а, Хьалха-Мартанара а юкъара хIусамаш таллар.
"Кавказан узел" агенталле меттигерчу бахархоша латкъамаш бинера, шайн гергара нах цхьа кехат а ца гойтуш хIусамашкара арабохуш бу аьлла.
Магерамова Малидин 8 бер ду, цуьнан цхьана а кIентан яц шен долахь хIусам.
"Хьайца харцо лелийна, хьан цхьа а вац гIо дан ма бохура ахь. 8 бер ма ду хьан", - бохуш, бехкаш доху эфирехь зудчуьнгара. Ишта бехкбаьккира Iедалхоша зудчун кIенташкара а, ненан дола ца дарна. Эххар а ша дохкояьлла, шена къинтIера довлар дийхира Магерамовас.