Къилбаседа Кавказан республикашна юкъарчу латтанашна тIехула гIаттийначу къийсамехь Нохчийчоьнан куьйгалхочунна тIехIоьттина нохчийн оппозицин блогер Абдурахманов Тумсо. "Дербент" агенталло бина цунах лаьцна хаам.
Кху беттан 5-чохь Ютюберчу шен эфирехь блогеро дIахьедира, 2018-чу шарахь ГIалгIайчоьнан урхалло нохчийн дола даьккхина латта Нохчийчоьнера дIадаьккхина дара "кIелдIахула", цигахь тIемаш боьлхучу шерашкахь аьлла.
Ишта Абдурахмановс емалбина, лурчаха латтана тIехула хиллачу бертана дуьхьалбевлла гIалгIайн жигархой а. Нохчийчоьнан Iедалхой бакъ буй хуушшехь, хIетте а шайчунна тIера ца бовлу уьш аьлла, тешна ву оппозиционер.
2018-2019-чу а шерашкахь дIаяьхьначу протесташа Европерчу нохчийн-гIалгIайн диаспорашкахь а юкъаметтигаш эгIийна боху Абдурахмановс.
Шен эфирехь хьахийна Тумсос Нохчийчоьнан Дагестанца иккхинчу конфликтех а. Цо бахарехь, Кадыров Рамзан а, парламентан спикер Даудов Мохьмад а урхаллехь лаьтта Iедал "100%" бакъ ду оцу хаттар тIехь.
"Дагестанан цхьа а таро яц дуьхьал дош ала, нагахь санна, КадыровгIар тахана шайна тIебагIахь а, ах Дагестан дIалацахь а, церан хIуммаъ олийла дац, хIунда аьлча, дахначу бIешерийн а, кху заманан а харцо - Аухан хаттар лаьтташ хиларна", - аьлла Абдурахмановс.
ГIалгIашца хиллачу къовсамехь Даудовс аьлларг а тайна Тумсона. Новолакан кIоштан де даздечу бараме гIалгIайн хелхаран ансамбл яхар тIехтоьхнера спикеро гIалгIашна. Цунна хетарехь, Ауховн кIоштарчу нохчашна депортаци яр даздар дара иза.