Оьрсийчоьнан чоьхьарчу гIуллакхийн министраллан сайта тIехь Байсаров Сайд-Хьамзат а, Иминова Карина а лоьхуш ду аьлла, карточкашца хаам хIоттийна. Нохчийчуьра йедда Эрмалойчу дIайахна хилла Баймурадова Iайшат йерна цу шиннах шеконаш йу. Бехкзуламан артиклаца ший а лоьхуш ду, ткъа Иминова билгалйаьккхина доь доцуш йайна йу аьлла. Хетарехь шен гергарчу наха а цхьана иза лоьхуш йолчух тера ду.
Иминован карточкаш тIехь чоьхьарчу гIуллакхийн министралло шина къоман векал санна билгалйаьккхина иза, ткъа Байсаровх лаьцна хаамаш банне а бац, хаамбина кризисан “СК SOS” тобано. Оцу йукъанна хууш дац, маца лаца кхайкхийна ду и шиъ Оьрсийчоьнан органаша, царна тIаьхьабовлар а муьлхачу Iедалан къепехула ду.
Эрмалойчоьно шеконаш йерш лехамашка белира стохка лахьан-баттахь, хаам бира Интерполе а, Оьрсийчоьне а. Делахь а 2026-чу шеран чиллан-баттахь жоп деана дацара. Баймурадова йийра Ереванехь гIадужу-баттахь, цул тIаьхьа бехкехетарш, талламан версица, пачхьалкхера арабевлла, Оьрсийчохь лечкъира.
КХИН А ХЬАЖА:
"Кхузахь а бале бевли-кх цунна". Нохчийчуьра йоI Ереванехь йийнаКарладоккху, Баймурадовас гӀо дийхира бакъонашларъярхошка, жимчохь дуьйна доьзалехь ницкъ бо шена тIехь аьлла. 2025-чу шеран йуьххьехь йоI Эрмалойчу дIайигира цигахь болх а карийра цунна, социалан машанашкахь аккаунташ йиллина, шен цIарца нохчийн Iедалхошна луьйш, эфирашка а йуьйлура иза. Иминова Iайштаца гергарло тасаделлера цуьнан, гIадужу-баттахь цуьнца цхьанакхета йахначул тIаьхьа Iайшат йийна схьакарийра Ереванера цхьана хIусамехь. Арахьа хIиттийначу камерашца гучуделира, тIаьххьара цу петарчуьра арадаьлларг Иминова а, Байсаров а хилар.
Байсаров цхьана хенахь кхел йина ву терроризмана ахча латторна, амма иза бехказа ваьккхира. Байсаров Сайд-Хьамзат вешин кIант ву бизнесхочун, Кадыров Рамзанан доттагIчун Байсаров Русланан.
- Эрмалойчоьнан Iедалхоша дIайолла шайн йоI дIайига аьлла, дахьийтинчу кехатна жоп ца деллера. Пхеа баттахь моргехь латтийра цуьнан дакъа. Эххар а Нубарашенскан кIоштарчу кешнашкахь Ереванехь дIайоьллира Баймурадова пачхьалкхан талламан органийн гIоьнца.
- Нохчийн зударшна тIехь республикехь а, дозанал арахьа а къизаллаш латторах хаттар тахана а ира долчех ду. Доьзалехь гIело латтарна цIера бевддачу махкарчу зударех лаьцна дийцарш гулдира тхан сайто. Дозанал арахьа а паргIат бац цхьаберш.