2002-чу шеран чакхенгахь Нохчийчохь Iедалхоша лачкъийна дIавигира 31 шо долу Духаев Гилани а, 29 шо кхаьчна волу Гатаев Ахьмад а. И ший а дIакхелхина полицин отделехь, бохуш дуьйцу адамийн бакъонаш ларъечу "Мемориал" Центро. И хаам меттигерчу хьасто бина бохура.
"Мемориал" центро дийцарехь, лахьан-беттан 19-хь Духаев Iедалхоша далецира Науран кIоштан Ищерски эвлахь. Иза цара Соьлжа-гIаларчу заводскойн кIоштан полицин декъе кхачийра - 8 де даьлча, лахьан-беттан 27-хь, иза дакелхира. Дакъа полисхоша Гиланин гергарчаьрга дIаделира, амма тезет хIоттон ца магийра. Iедалхой уллохь болуш давоьллира Гилани.
Гатаев Ахьмад, бакъоларйархоша дийцарехь, гIуран-беттан йуккъехь далаьцна вара. Хьалх-Мартан кIоштарчу Олхазар-кIотарахь. Цу деношкахь кIоштахь дIахьош рейдаш йара. Росгвардин стажерна а, ГИБДД-н белхалочунна а йуккъехь иккхинчу девнан тешаш лохуш. Гатаев полицин декъе кхачийра. Ши кIира даьлча цуьнан нахе иза велла аьлла, хаам бира. Гатаевн тезетахь цуьнан уллора гергарнаш бен бацара. Тезет Iедалхой тIе а хьовсуш, дIадаьхьира. "Мемориал"-н белхахоша дуьйцу, гIуран-беттан чакхенгахь йуьртахоша мела луш, ламазаш дира цунна тIера.
Официалан Iедална оппозицехь йолчу "Niyso" телеграм-каналехь Гатаев а, Духаев а дIалацарах хаамаш хьалхо бинера. Социалан машанашкахь лайк хIоттор бахьанехь давигира Гатаев, дийцира канало. Цуьнан гергара нах а кхерамаш тесна, совцийна бара. Нагахь аша оха хIара давигарх, хIара тхо долчохь кхалхарх дерг нахала даккхахь, охьа могуьйтур дац шуна, аьллера цара.
- Дечкен-беттан 8-хь кадыровхоша Iалхан-ГIалара 25 вахархо дIалецира. Цу беттан 18-хь иза хилар бакъдира адамийн бакъонаш ларйечу "Мемориал" Центран белхахоша. ДIабигначарлахь вара ши ваша: Солсаев Хьамзат, Солсаев Леча. Цушиннан гергарчу стага дуьйцу, и шиъ Соьлжа-ГIалахь Iазапехь латтош хьийзош ву бохуш. Республикерчу Iедалхошна критика йарна дIавигина бохура. Цу кеппара хьийзош латтош ву Мусаев Iусман а. ТIаьхьо цу Iусманан гергарнаш а далецира.
- Нохчийчоьнан куьйгалхочо Кадыров Рамзана шен къайлах набахтеш йанне йац, аьлла дара. Шен цIенна уллохь адамаш чукхуьссу тоьланаш а йац элира цо. Амма цунна оппозицехь волчу Янгулбаев Абубакара дийцира Кадыровн набахти муха йу а, ша цу чохь муьлхачу хьолехь латтийра а, Кадыровс шена тазарш дарехь дакъа лацарах а.