Your browser doesn’t support HTML5
"Говр татта" хезара Чернокозовохь
Турнирана кечам а бина, иза дIаяьхьнарг яра къаьмнашна юкъахь доттагIалла лелон клуб «Кунаки». Цуьнан президенто Успанов Юнис иштта элира оцу къовсадаларх а, цуьнан жамIех а лаьцна.
Успанов: «Вайна хууш ма хиллара, кхузахь чубоьхкина нах бу. Мухха а бахьанашца уьш кхуза кхаьчнехь а, церан гIуллакхе хьажа деза вай. Дуккха а мероприятеш а йина оха. Спортан кхин а къийсадарш а дIахьур ду, артисташ а, Iилманчаш а балор бу».
Цхьана хенахь дика цIе йоккхуш яцара Чернокозовера набахте. Хийла стага бала лайна меттиг ю иза. Жигара тIемаш боьдучу хенахь, оьрсийн эскархоша цу чохь дукха адам хьийзийна.
Тахана и набахте Оьрсийчохь тоьллачарех лоруш ю. Хьуна муха хийтира, тутмакхийн хьал а, дахар а муха ду цигахь хаттарна иштта жоп делира юкъаралхочо Успанов Юнис.
Успанов: «Оцу набахте лела волавеллачу хенахь дуьйна, ас толлуш дара церан цигара хьелаш. Цара массара бохуш дерг юучуьнца а, молучуьнца а, хан яьккхарца а хьал во дац. Суна лаьара иштта набахтешкахь Оьрсийчохь чохь бохкуш болу тутмакхаш цIа а балийна, кхузахь уьш латтабойла».
Чернокозово эвларчу набахтехь шинариндийнахь дIаяхьира шахматех ловзаран турнир. Наур кIоштахь, шаьш-шайх бIобулучу шахматхошна ма хетта атта ца хилира оцу къийсамехь толамбаккха. Хьалхара меттигаш, бакъду, ехира хьешаша, амма, шолгIа а, кхозлогIа а меттигаш ехира тутмакхаш.
Your browser doesn’t support HTML5
Чернокозово. Шахматийн турнир
(ХIара видео яийтина Маршо Радионе "Чернокозовохь" шахматех ловзар вовшахтоьхначу "Кунаки" тобан куьйгалхочо Успанов Юнис)
Адам цIе йолчу шахматхочун хетарехь, иштта цхьаьнакхетарш кест-кеста дIадаьхьча дика хир дара.
Шахматхо Адам: «ЧIогIа дика чекхйелира хIара мероприяти. Тхо Наур кIоштара шахматийн клубера ду. Чубоьхкина нах кхана-лама цIаберза безаш бу. Тхо даьхкина чIогIа хаза а хийтира царна».
Тутмакхана Журненков Сергейна хетарехь, царна чIогIа пайда болу цу тайпа мероприятеш дIаяьхьча.
Журненков: «Оха къобалбо тходолчу баьхкина нах. Тхуна чIогIа хазахета иштта хуьлуш. Тхуна даима тов иштта хьеший. Оха дегнашца а, синкхетамца а тIеоьцу уьш. Шахматашца боьзна муьлха а гулам оха дика тIеоьцу. Оха баркалла олу царна».
Еккъа цхьана шахматашна тIехь соцур дац Чернокозоверчу набахтера спортехь хьунарш къовсар. Кестта мини-футболан а, стоьлан тIера теннисан а къийсадаларш дIахьура ду цигахь.