Дуьненаюкъарчу журналистийн федерацин хьосташна тIе а тевжаш, РИА Керланаш агенталло яздо, 2016-гIа шо даладелчхьана шайн белхан декхарш кхочушдечу хенахь дуьненан пачхьалкхашкахь велла верриг а 66 журналист. 2013-чу шарахь Цхьанатоьхначу къаьмнинй организацин (ООН-ан) Инарла Ассамблейно билгалдаьккхинчу журналисташна дуьхьал дина зуламаш таIзар доцуш цадитаран де герга кхоччуш Iорадаьккхина и терахь.
Федерацин хаамашца, ОвхIанистанехь 11 журналист вийна, Мексикехь 8, Иракъехь 7, Шемахь, Йеменехь, Пакистанехь, ХIиндойчохь, Гватемалехь пхиппа вийна, Бразилехь 3, Ливихь, Туркойчохь, Сомалихь, Филиппинехь шишша, Гвинеехь, Урдунехь, Къилба Суданехь, Украинехь цхьацца.