Шемин Iедалан эскарша мукъаяьккхинчу Алеппон малхбалерчу декъера бахархой кхерамзалла йолчу дехьабаха болор бу кхаарин я еаран дийнахь, хаам баржийна дуьненан агенталлаша. ТIом а сацош, маьрша нах арабаха бартбина агIонаша – Асадан Iедало а, гIаттамхоша а.
Дийцаршкахь дакъалаьцна Оьрсийчоьно а, Туркойчоьно а. Ткъа цкъачунна гIаличуьра арабовлийтина бац нах. ГIаттамхоша цунна бехкедо Асадехьа тIемаш беш йолу гIажаройн тобанаш. Шаьш маьрша алеппохой къелхьарабохуш дакъалаца кийча юйла дIахаийтина дуьненаюкъарчу хьукматаша.
Оьрсийчоьнан Цхьанакхеттачу Къаьмнийн организацинерчу векало Чуркин Виталийс дIахьедира шинарийдийнахь, Алеппо ерриг а Асадан ницкъийн карахь а ю, цигара тIемаш а севцца, аьлла.
Оцу юкъанна, Оьрсийчоьнан Нью-Йоркерчу Цхьанакхеттачу Къаьмнийн организацинерчу миссина гергахь протестан акци хIоттийра Iамеркахоша. Демонстрантийн карахь дара «Бераш дойург» тIеяздина президентан Путинан суьрташ.