ТIекхочийла долу линкаш

ЦIеххьана кхаьчна хаам!

Петирова ПетI мат. ХIара хаза хиллехьара…


Петирова ПетI мат. ХIара хаза хиллехьара…

Кхуо дукха ойланаш йора шен дахар цанисдаларх…Даим а коьрте хьийзарг цхьа хаттар дара: «ХIунда?!»

Кхуо и хаттар дан а дира, цхьа бегIийла хан а лехна, цIийнадеца даггара къамел а дина, кхидIа хирдолчун сурт мукъане а хIотто дагахь…

– Баккъал а, ма дош дац-кх хIара вайн хене дийлар… Ма кIадъелла-кх со! ХIун дийр дара-те, хIара вайн доьзалера сурт хийца?! Хьо сайх воккхавейта ас дийр доцуш хIума дацар-кха… Хьо стенна реза вац хаахьара… Нехан зударий марера боьхча, гIуллакх ца дора я гIиллакх дацара олий, дийца доккхург и гIуллакх-гIиллакх хуьлур-кха… Ас сайгара муьлхарг нисдича барт хир бара-те вайн? Хьо резава хийцалур яр-кха со… Алахьа, баккъал а – гIуллакхаш де ас кхин а совъюьйлуш, я гIиллакхца нисло?

Цецваьлла, шена хIара дуьххьара гуш санна, хьаьжира важа (гуш хила а там бара дуьххьара, адам ду-кх хIара аьлла, кхуьнан бIаьра хьажа и ларош а вацара)… Вехха Iийра ойлаеш а… ТIаккха хезначо хIара а яьккхира цец…

– Цкъа а, цхьана хIуманна тIехь хьуна билла бехк хилла бац-кха сан а, сан нехан а… Хьуна дан дезарг хьоьхуш а ца хезна суна сан нанас, я хьоьх бехкаш дохуш а ца хезна… Цкъацкъа со-суо а цецвуьйлу, ас хьайгахь латточу Iазапца, сан нахана а, суна а ела дог хьан дарах а, хьайн дагара ца хаийта ахь хьайна бечу ницкъах а… Хьуна ала цхьа а хIума дац-кха сан… Амма хIетте а хьо ца еза-кх суна…

– ХIунда?!

ТIаккха цо деллачу жоьпан ойла кхуо цул тIаьхьа даьхкинчу шерашкахь дуккха а йира…

– Хаза яц хьо… Суна хаза ца хета… Цундела ца еза…

– ТIаккха-м ца хаьа суна…

– Со кхин стенах цецвуьйлу хаьий хьуна?

– Стенах?

– Массо а хIуманна яхь йолчу хьан, суна хьо ца оьший хуъушехь, соьца ца Iен яхь яц-кха…

– Яц… И хIунда яц хIинца а ца кхетта-кх хьо…

– Сайх ца ялалуш ца Iай-м хаьа суна…

Кхуо хIинца а йо цуьнан дукха ойла… ХIетахь а, хIинца а…Амма башха-башха…

Цкъа юьхьанца хетара, баккъал а, со хаза хиллехьара, кхечу кепара хир ма дара хIара…

ТIаккха цхьа ойла къегира: «Ванах, куц хаза цахиларх, кхин со адам хета бахьана дацара-те?! Цхьана нехан, цхьана ден-ненан йоI ма яра со… кхин хIумма а ца хилча а, цаьрца гергарло таса а захало дийр ма дара аьлла, нехан ойла а лаьтташ… Сайн ма-хуьллу тасаелла, кхаьрца мага а ма гIертара со, даггара хIорш беза а ма безара…

Ткъа хIинца ша-шех йоьлу… ша «ХIунда?!» аьлла динчу хаттарх а…ша йинчу ойланех а…

ХIун биэн дара иза, хIундда а езаш а, оьшуш а ца хиллехь а… муьлхха жоп а цхьаъ хилча – ца еза дела… ца оьшу дела…

ХIара хаза хиллехьара… тIаккха ша дара….

Петирова ПетIамат нохчийн кхузаманахьлера байтанча ю. 1982-чу шеран чиллан-беттан 12-чу дийнахь Элистанжа юьртахь дуьнен чу яьлла Петирова ПетIамат. Циггахь кхиамца чекхъяьккхина юккъера школа. Доьшуш йолуш тасаделла цуьнан литературица гергарло.Лакхарчу классашкахь доьшуш йолуш йолаелла байташ язъян. Юккъера школа кхиамца чекхъяьккхина яьлча, Нохчийн Республикин пачхьалкхан университетан филологин факултет чекхъяьккхина. 2006-чу шарера 2008-чу шаре кхаччалц «Книжни издательствехь» болх бира ПетIамата. ХIинца «Исламан зIаьнарш» цIе йолчу республикин газетехь коьртачу зорбанчан болх беш ю.

XS
SM
MD
LG