ТIекхочийла долу линкаш

ЦIеххьана кхаьчна хаам!

25 шо ду Абхазехь тIом бирзина, амма халонаш тахана а лаьтта...


Хабибулаев Гилани
please wait

No media source currently available

0:00 0:05:41 0:00
Линкана тIе

Нийса 25 шо хьалха, Марсхьокху - баттахь йолаелла лору гуьржашний-абхазашний юкъахь конфликт. Йоьжначу Советан пачхьалкхан юкъера яьллачу Гуьржийчоьнах дIакъаста лиинчу Абхази чудалийнера эскарш.

Абхазашна дикка гIолаьцнера Оьрсийчоьно а, Кавказера юкъараллаша цига хьовсийначу наха а.

Нохчийчуьра а бахнера шортта. ХIеттахь, 20 шо долу нохчо Хабибулаев Гилани эскарера цIавирзина хилла. Ша болх бинчу радиозаводе балха а ца воьдуш оцу тIаме вахна иза. Шен коьртаниг дара, кIезиг болчу абхазашна гIодар бохуш, дагалоьцу цо.

Хабибулаев: "1992 шарахь эскарера цIавеара со. Абхазерчу тIаме нах бара гулбеш. Ас хаьттира и тIом беш болу гуьржий а, абхазаш а мел бу. 4-5 миллион гуьржий бу, абхазаш 100 эзар ву. Вайн дайшкара дуьйна схьадогIуш дара гIийлачунна гIодар. Гуьржий ца безар а дацара, я абхазашка уозар а дацара. Со жима волу дела царна тIе а хIоьттина, гуьржашна дуьхьал валар хилира сан".

РМ: Маса стаг велла цигахь нохчех?

Хабибулаев: "Абхазин архивехь 77 нохчо ву велла аьлла билгалдаьккхина ду. Ткъа вуьшта 120-х стаг ву. 32 оцу тIамехь лар йоцуш вайна а ву. Гуьржийн йийсаре бахана вайн салтий а гина. Царна тIе пIелг ца Iоьттина меттигаш а ю, цIаберзийна уьш тахана а шайн доьзалш а болуш, маьрша бехаш бу".

Гуьржаша а, абхазаша а вовшашна тIе бехкаш дохкура, оцу тIамехь къизаллаш лелийна бохуш. Абхазойн агIо лаьцначу нохчаша байинчу гуьржийн кортошца футбол левзина бохуш дийца долийра. Иза бакъ дац, иза бакъ хуьлийла а дац, хIунда аьлча, мах а ца оьцуш, лахь-бала а, бисахь-биса а аьлла, гIийлачарна шаьш гIодан дахана дара аьлла, дийцира Хабибулаев Гиланис.

Хабибулаев: "ТIом буьйцучохь харцонаш дукха хуьлу. «Информационная война» олу цуьнах. Гуьржийн маьрша нах а гина цигахь. Уьш кIелхьара а баьхна. Нохчаша кортошца буьрканах ловзарх аьлча, иза къайлахчу сервисаша долийна эладитта ду леррина. Гагры-гIала яьккхинчул тIаьхьа Малхбалерчу фронтехь Сухум-гIала яра яккха езаш. Оцу бахьанца психологин тIеIаткъам бара гуьржийн салташна беш, шуна а изза хир ду шуна бохуш".

25 шо дIадаьлла Абхазехь тIом дIабирзина лору. Абхаи йозуш йоцу пачхьалкх ша ю боху. Оцу ехачу хенахь цигахь кхин тоделла дац бохуш дуьйцу дахар. ХIун бахьанаш ду цуьнан аьллачу хаттарна иштта жоп ло Хабибулаев Гиланис.

Хабибулаев: "ТIом хиллачу меттехь шатайпа цамгар хуьлу. Со вайн махкахь ваьхна ву. Кегий нехан а, баккхийчеран а дог-ойла а цхьана кхечу агIор йоьрзу. Дуьненехьа йирзина хьулу. Балхана тIе йирзина ца хуьлу. Абхазехь а изза хьал ду. Къаьмнаш а дуккха а ду цигахь. Халонаш ю цаьргахь. Лулахоша царна гIодина, цигахь хьал тодалийта лаьара суна".

Дуккха а хан дIаяьлла гуьржашний, абхазашний юкъахь тIом хилла. Абхазаша муха туьду и зама хIинца? Гуьржашца абхазаш берта гIур бу аьлла хетий хьуна?

Шена цуьнах хетарг иштта довзуьйту Абхазехь тIом бинчу нохчийн юкъараллан коьртехь волчу Хабибулаев Гиланис.

Хабибулаев: "Оцу машарна реза волуш суна-м ца хаавелла цигахь цхьа а абхаз. Шайн йозуш йоцу пачхьалкх ю олу цара. Гуьржашца а маьрша баха кийча бу уьш, цара шайн пачхьалкх къобал яхь. Шаьш чIогIа бала а лайна, тIом а лайна, Оьрсийчоьно йина блокада а лайна, нах а белла шай боху цара. Иза дицделла дац шайна боху цара. Историн бала лайна къам ду абхазаш. Дуьне мел ду баьржина а бу уьш".

Абхазехь а, Карабахехь а, тIемаш боьлхучу кхечу меттигашкахь дIахьочу а, дIабаьхьначу а тIемашкахь дакъалаьцна нохчаша. Тахана а, Шемахь а, Иракъехь а дукха бу уьш.

Тахана Хабибулаев Гиланис лечкъош дац, оцу тIамехь дакъалацаро шен мел долу дахар хийцина хилар. Цига ца ваха хьекъал кхаьчнехьара ша маьрша говзалла а йолуш адам хила мегара элира цо.

Шуна хетарг

Гайта комментареш

Тахана харжамаш хилча, мила хоржур вара ГIалгIайчоьнан куьйгалхо?

ХIара Iилманца нисбина кхаж бац. Жоьпаш деллачарна хетарг бен ца гойту кхо.

XS
SM
MD
LG