Бух боцучу бехкаца набахте а хьажийна, цигахь 8 шо даьккхинчу Муртазалиева Зараъна дуьненаюкъара совгIат делла Италерчу Болонья гIалахь.
Италхойн адамийн бакъоларъяьрхочун, юкъараллин жигархочун Даниэла Пон цIе йолчу оцу совгIатах олу „Машаран преми“. 2007-чу шарахь дуьххьара юккъедаькхина ду иза. Дуьненан юкъараллехь ша жигара гойтуш а, адамийн бакъонаш хьешарна дуьхьалоеш а болчу нехан къинхьегамна тIе тидам бахийтар ю совгIатан Iалашо.
Кхушара Машаран преми лучех цхьайтталгIа ю нохчо Муртазалиева Зараъ. Цунна иза кхачор довзуьйтуш оргкомитето шен сайта тIехь яздина, и йоI гIалатца терроризмна бехке а йина, 9 шарна чуйоьллина, амма ша хьегначу халонашна къар ца елла иза, аьлла.
