ХIирин мехкан Мазалк кIоштахь полисхошна герз тоьхначарна юкъахь нохчий хилла бац аьлла, кхаьчначу хаамо хьаам бина вайнахана.
Бен-бечу къаьмнийн диаспорашна юкъахь догазаллаш а кхуллуш, шуьйра дийцаре деш лаьттира иинцидент, ши бутт хьалха тIай тIехь лаьттачу полисхойн постана тIе, кхо низамхо лаза а веш, герзаш тохар.
Вайнахах дегабаам бар алсамдоккхуш хIума хилла и тохар Нохчийчуьра схьабогIучу некъаца, Мазалк гIалина чувулучу меттехь, Калининск эвлана юххехь нисдалар.
ХIетахь оьрсаша а, хIираша а, нохчаша а цхьабосса коьртах а даьккхина дийцаре дина, геннара герз тIе а дуьстина, муьлш бу ца хуу нах къайлабовлар.
"Туькана тIехьара герз тIе а кIирдина, къайлабевлла. Буьйсанна тоьхна герз. Масех лаза а вина. Бехкенаш лохуш бу", - герггарчу барамехь ишта дуьйцу шайна хуучух могIарерчу наха.
Цхьаболчара и бехке хилар йоккхачу шеконе а дуьллуш, и герз тоьхначу тобанан декъашхо ву аьлла, ГIадужу- беттан 26-чу дийнахь Iедало лаьцна 28 шо долу Черваев Алим.
Мазалк кIоштехь бехачу вайнаха даре дарца, сацийнарг гIумкийн къомах стаг ву. Цунах дуьйцуш ву дукха хена дуьйна а цигахь вехаш волу Дандиев Хьасан.
"Суна хетарехь и лаьцнарг гIумки ву я турко ву, нохчо вац. Хабарш-м дуьйцура, и меттиг нисьеллачу муьрехь вайнахана тIе томмагIа тоха санна. Цхьадика иза бакъ ца хилла",- боху дукха хенахь дуьйна а Мазалкехь вехачу Дандиев Хьасана.
"ЧерваевгIар гIумки бу. И мичара ву ала ца хаьа суна. Цу зулам юкъахь нохчо хиллехь, и дижа ца дуьтуш, кхайкхош а хир дара, хаза хетахь бен цуьрриг хала а ца хеташ, - элира 30 шарахь сов Мазалкехь вехаш волчу Чимаев Майрбека. - Билггал хууш ду нохчий цу юкъехь хилла бац, ткъа и лаьцна бохург шеко а йоцуш гIумки ву".
И герз тохарх а, и бохаме меттиг бахьанехь вайнахе цхьана кепара кхийдош бехк цахиларх а, шаьш нохчашлахь бечу балхах а хадам боллуш дийцира Мазалк кIоштехь диаспора коьртехь волчу Хатаев Нурдис.
"Черваев гIумки ву. Цхьа-а нохчо цу юкъахь хилла вац. Суна хууш цхьа турко а хилла, гIумки а хилла. Ишта меттигаш ца хилийта, вайнехан вон цIе ца яккхийта, оха хаддаза дIахьош болх бу кегийрхошлахь а, студенташлахь а. Тхайн кIоштехь бехачу нохчашлахь тхан вовшех цакхетам бан а бац, тхуна мотт карабо. Гуттар а бале бовлурш, сакъера а, самукъадаккха а цхьана ханна тIеоьхуш болу кегийрхой бу. Молий а, узий а, тухий а цара латтабо тхоьгахь сингаттам, - боху диаспоран коьртехь волчу Хатаев Нурдис.
Гуьйренан хьалхарчу баттахь, герзаш а дуьйлуш, Мазалкехь нисьеллачу Iоттабаккхамечу меттигах дийцина Хатаев Нурди а, Iар-дахар а, болх-некъ а цигахь нисдина беха кхиберш а тешна бу, массо къаьмнийн цхьаьнакхетараллаш вовшех дага а йовлуш, вовшашца зIе а латтош, болх баро, Iедалхошца йолу юкъаметтиг буьйлина мерз санна ца хуьлуьйтуш, кхетамечу, тешамечу хорша ерзор ю аьлла.
