Австрерчу ТIайнаш олучу гIодаран цхьаьнакхетараллин, нохчийн диаспорин цхьаьна болх барехь меттигерчу Санкт Андре олучу гIалахь дIаяьхьира меттигерчу бахархошна нохчийн Iадаташ а, култура а, истори а йовзийтарна лерина суьйре. Венехь а, Лахарчу Австрехь а бехачу вайнаха дийцира гулбеллачарна, нохчийн къам шен шира истори а йолуш, вуно ша-башха култура а, ламасташ а долуш хиларх. Нохчийн барта кхолларалла а, духарш а, кхачанаш а муха хуьлу а дийцира.
Цхьаьнакхетаре гулбелла хиллачу меттигерачу бахархоша а, юкъараллин жигархоша а дуккха а хеттарш дира нохчийн диаспорин векалшка, хаамийн гIирсашкахь нохчийн кегирхойх лаьцна кест-кеста зорбане довлучу негативечу йозанашца доьзна а, Оьрсийчоьнан, Нохчийчоьнан юкъаметтигех лаьцна а, Австрехь бехачу нохчийн Iер-дахарх лаьцна а.
Къаьмнашна юккъера барт а, кхетам а алсамбаккхархьама и санна долу цхьанакхетарш кхечу гIаланашкахь а дIадахьа барт хилира суьйренан декъашхойн.
