ТIекхочийла долу линкаш

Австрерчу Кернтенерчу полисхойн леринчу тобано лаьцна веа стагах лаьтта кегирхойн тоба. 19 шо долу цхьа нохчо а, 15 шарера 18 шераш кхаччалц хенаш йолу кхо австрихо а декъах волу и тоба бехке еш ю, метиггерчу бахархойн петаршкахь къоланаш дарна а, цу петарийн долахошна ницкъ барна а.

Кернтен гIаларчу полицин векало Маршо Радион корреспонденте бинчу хаамца, и кегийнах масийтаза тайп-тайпана талорш дарехь Iедална гучубийлина а, полицино тидаме эцна а хилла.

Карарчу хенахь уьш лацаран бахьана ду, масех кIира хьалха цара Клагенфурт гIалахь цхьана 18 шо долчу меттигерчу вахархочуна къиза таIзарш а деш, цуьнан петарера хIумнаш а, ахча а лачкъийна хилар. Цул совнаха, полисхоша лору, цара оццу муьрехь цхьана кхечу 28 шо долчу меттигерчу вахархочунна а къола дина аьлла.

Iедалхошна чIагIдарехь, тобан куьйгаллехь хилларг нохчо ву. Цара шайн закъалташна къиза ницкъ бина хиларна, тобан декъашхой кхераме а лерина, уьш лаца полицин Кобра олу лерина ницкъаш хьажийнера.

Лецначийн петаршкахь цара лечкъийна хIумнаш карийна, полицино дийцарехь.

XS
SM
MD
LG