ТIекхочийла долу линкаш

ЦIеххьана кхаьчна хаам!

Сталин велла де: Авторханов Iабдурахьманан "кадам"


Зазадоккху-беттан 5-чу дийнахь велла Сталин Иосиф. Оцу дийнахь нохчийн диссиденто-историка, Кремлан хатI дуьненна довзуьйтуш вехачу Авторханов Iабдурахьмана Сталина шен къомана а, ерриг Орсийчоьнна а мел дина зенаш дагалецира.

«Эххара а вели Сталин. Детталучуьра сеци чагΙалкхан дог, болх бечуьра сеци йилбазан корта.

ДΙадаха шеца я ларам а, я безам а, я къинхетам а, цхьа а адамаллин хьаса а боцуш даьхна адам.

Шийлачу чалтачан амалой, шен са лардан хуучу дийнатан стешхаллой адаман тайпанца догΙуш а доцчу акхаройн тайпанах дΙатарвора иза.

ДΙаваха, адамашлахь уггаре а тоьллачу миллионийн синош чекистийн баннашкахь, Сибрехан варшашкахь, Колымарчу маьΙданийн оьрнаш чохь, Юккъерчу Азин гΙамаршкахь, Кавказан лаьмнашкахь хΙаллакдарца, шен цΙе яха йитина стаг.

ДΙаваха, цкъа а хилла доцу пачхьалкхан лолла , къизаллин Ιаьржа бода кхоьллина а, чΙагΙбина а, шорбина а волу стаг.

ДΙаваха, хΙинца да а велла, байлахь бисина саьхьара шен гΙентах тийсало, шех тера, ша санна болу халкъан чалтачийн бΙонаш кхиийна стаг.

ДΙаваха гΙаттамаш, революцеш, тΙемаш бахарехь, шех шайн ах-дела а вина, цуьнан лаамаш кхочушбеш дуьне а бале хΙоттон кийча хьийза говзанчаш кхоьллина а, кхиийна а волу стаг.

ДΙаваха ткъе итт шеран дохалла, хуьлуш цхьа а бекхам а боцуш, вайн дайн, вежарийн цΙийлахь, вайн нанойн йижарийн бΙаьрхишлахь нека деш ваьхна стаг.

ДΙаваха, кху дуьнентΙехь лела а лелла, неΙалт хиллачех уггаре а неΙалт хилла стаг.

Таллан гΙуркх болийла цуьнан коша чекх!

Цкъа а ца дов неΙалт хуьлда цунах дисинчу иэсана!!


Луьра тΙом лаьттийла цуьнан тΙаьхьалонца!!!

Иштта бу вайн къаьмнийн сардам.

Иштта хир бу иза тΙейогΙучу тΙаьхьенийн а».

Оха хьоьхург

XS
SM
MD
LG