ТIекхочийла долу линкаш

ЦIеххьана кхаьчна хаам!

Оьрсийчоьне кхайкхамбина ПАСЕ-н декъахоша Немцов вер таллар юхадоладе аьлла


Немцов Борис
Немцов Борис

Европан Кхеташонан Парламентан ассамблейно (ПАСЕ) Оьрсийчоьне кхайкхамбина, политик Немцов Борис вер таллар юхадоладе аьлла. Литван делегацин декъахочо Зингерис Эмануэлиса лерина кечйинчу рапорт тIехь билгалдаьккхина, оппозицин политик верах бакъдерг хIинца а къаьстина дац аьлла. Талламаш дIахьочу юкъанна хIиттийначу камераша дIаяздинарг карийна дац, оцу зуламан цхьаболу тешаш лебина а бац, доккхачу декъанна. Цул совнах, ПАСЕ-с тергойина, дов хоттучу хенахь коьртачу тешийн тоьшаллаш бIостане хиларан а, ишта кхелан процессехь низамаш дохийна хиларан а.

Iедалера пурба ца хилча Немцов вен зуламхой хIуттур бацара аьлла хета ПАСЕ-н декъахошна. Шайн цу кепара шеконаш кхоллаяларна жоьпалла Оьрсийчоьнан Талламан комитетан куьйгалхочунна Бастрыкин Александрна а, Инарла прокуроран гIовсна Гринь Викторна а тIехь дуьту цара.

"Европан Кхеташонан Парламентан ассамблейн Iалашо яц Немцов Борис вер таллар а, бехкениг къастор а. Амма гуш ду, сацам тIехь Iораяьккхина официалан верси талламан а, кхелан процессан а ладамечу гIалаташна тIехь хилар а, дуккхаъчу фундаментале хаттаршца йолчу уликашца йогIуш цахилар а", - аьлла, билгалдаьккхина рапорт тIехь.

2015-чу шеран Чиллан-беттан 27-чохь вийра оппозиционер Немцов Борис Кремлна герггахь. Оцу зуламна бехкевина пхи стаг набахтехь хан токхуш ву. Мила вара иза вен тIедожийнарг хIинца а къастанза дуьсу.

Оха хьоьхург

XS
SM
MD
LG