ТIекхочийла долу линкаш

ЦIеххьана кхаьчна хаам!

Москох хан тоьхна, ши адам а дуьйш, некъахьовзамехь дакъалаьцначу нохчочунна


Москох Можайское шоссехь, ши адам а дуьйш, хиллачу некъахьовзаман декъашхо Джамбеков Муслимна 2,5 шо колонехь даккха хан тоьхна кхело. Цунах лаьцна хаам бо "Московский комсомолец" газето.

34 шо долу Джамбеков Соьлж-ГIаларчу полице веара, Нохчийчоьнан куьйгалхочо Кадыров Рамзана шега кхайкхам бинчул тIаьхьа.

Зуда а, 14 шо долчу кхиазхо йоI а юьйш, бохам хилира Зазадоккху-беттан 23-чохь. "Нива" а, Mercedes Gelandewagen а дуьхь-дуьхьал кхеттера Можайское некъа тIехь. И бахьана долуш "Нива" машенна чохь хилла зуда а, кхиазхо йоI а йийнера, цунна урхалла деш хилла стаг охьавиллинера дарбанан хIусаме.

Mercedes-ан хьалха хиинарг къайлаваьллера некъабохам хиллачу меттера. Хьалхо хаам баьржинера цу машенан долахо Нохчийчьура ММА латархо Дудаев Iабдул-Рахьим ву, ткъа бохам хуьлуш цунна хьалха хиина цуьнан накъост Джамбеков Муслим хилла аьлла. И стаг талор дарна хан текхна ву, бохуш яздора Оьрсийчуьрчу зорбанан гIирсаша. ТIаьхьо Дудаевс дIахьедар дира, и машен ша йоьхкина 1 шо а дара аьлла.

Джамбековс 1 300 00 сом ахча делла хилла хала киртиг тIехIоьттинчу цу некъахьовзамехь еллачу зудчуьн майрачунна Роменков Раманна, суьдехь хьахийра Кадыров Рамзана делла бохуш кхин а 600 эзар сом.

"Ахча ахча ду, амма хьан юхалур ю суна зуда а, йоI а", - хоьттуш вара Роменков. Джамбековна дина таIзар дукха кIеда хета шена, амма иза латкъам бан дагахь ву кхело бинчу сацамна, бохуш вара иза.

Комментареш

New Comments Available

Оха хьоьхург

XS
SM
MD
LG