Гадаев Мохьмад-Салахь
Вешега
1
Вовшех нах хьегаран барз хуьлуш хилча,
Вайшинниг баьрзашлахь сов хир бара.
Вовшех дог Iийжадар терзанца хилча,
Терза а вайшинниг дазлур дара.
Орцанан мохь боцуш, вайша садеттахь –
Яхь йожо йиш яцар ду.
Хиллачийн бахьанаш вайшинга хеттахь –
Замано уьш дуьйцур ду.
Амма хьо,
Кхаьжнашлахь вайшинниг декъаза ларий,
Цуьрриг а холча ма хIотта:
Хьегарца бустало
Вежаршкахь лаьттачу марзонан барам,
Хьегар вайн дан ма ду шортта.
Хьегарах барз хуьлуш хилча,
Вайшинчух лам хир бара.
Iийжавар терзанца хилча,
Пуьнтийн чот – рагI хир яра.
2
Кхоьру со, кхоьру со,
хьол тIаьхьа висна,
Даг тIехь сайн дагарна цкъарг,
Диллина Iеначу
дуьрчу цу хишна
ЦIийбелла Iийжарна бIаьрг.
ТIаккха со хьоьжур ву
саццанза гонах –
Массанхьа лоьхур ву хьо.
ГIийла гIулч йохур ю,
воьттина вонах,
Кхераме кхача тарло.
Кхоьру-кх со, хьол тIаьхьависна,
Кийрахь сайн Iийжарна стим.
БIаьргаха Iеначу хишна
Велла со хьийзарна жим.
3
Хьоьга а хIуттур ду-кх
изза сурт нийсса,
Сан валар хьол хьалха хилахь.
Дахаран некъашкахь
цхьана а висна,
Логехь шад кхоьхьур бу-кх ахь.
Цунна ду аьрхалла
кхалхарехь суна.
Кхидериг ас тергал дац.
Лан ца луш, новкъа ду
новкъа дерг хьуна,
Хьох лазар кхачо тигац.
Сан валар чIогIа ма къала:
Хьалхарниг соьгахь ю рагI.
Нахала гIийла ма вала:
Ишттаниш лайна бу нах.
4
Воьлла со-м сайн хьолах,
Воккхавер доцчу.
«Зовкхаша» хьега а вац.
Сайх воьлхуш, бIарзвелла
хьийзачу цулла,
Хьуна бен бIаьрг а лашац.
Ницкъ ма бе хьайна ахь селла:
Сайн мохь ас атта хьош бу.
Вахарехь мерза ца лелла,
Верзаре хьаьжна Iаш ву.