Bellingcat: Европерчу нохчашна дуьхьал «болхбечех» хила тарло ФСБ-н полковник Егоров

Украинан малхбалехь тIемаш лаьттачу 2014-чу шарахь телефонан къамелашкахь "Эльбрус" цIе лелийнарг а, Донбассан стигалахь Малайзин "Боинг" чудожош хьийзинчаьрца хаавелларг а цхьа стаг ву – Оьрсийчоьнан ФСБ-н полковник Егоров Игорь. Оцунах тоьшалла до шаьш пIераскана бовзийтинчу талламехь Bellingcat тобано а, The Insider сайто а, der Spiegel газето а.

Хьасташа дийцарехь, ФСБ0-н лерринчу "Вымпел" тобанехь болх бина Егоровс. Дакъалаьцна ГIирмин аннекси еш, ткъа 2014-чу шеран аьхка "куратор" лаьттина Оьрсийчоьнехь болчу Луганскерчу сепаратисташна тIехь, зIенехь "Эльбрус" цIе а лелош. Оццу цIарца хьахош ву иза, дийцарехь, 2014-чу шеран Товбеца-беттан 17-чу дийнахь Оьрсийчоьнан "Бук" герзаца Малайзин "Боинг" чудожор зуьйчу дуьненаюкъарчу талламан тобан документашкахь а. Донбассерчу Оьрсийчоьнан тIеман куьйгаллин векал санна вуьйцу иза. Бакъду, талламо ца хоуьйту, билггал мила ву "Эльбрус" цIе лелийнарг.

Вуьйцу Егоров дукха хан йоццуш Украинин Кхерамзаллин урхалло лаьцна инарла-майор Шайтанов Валерий хьахош а. ЧIагIдо, цо ваьккхина шегахьа Шайтанов, бохуш. Донбассехь Украинехьа тIемаш бинчу Осмаев Адамна кIелоян Шайтанов новкъаваьккхинарг а ву Егоров, боху хьасташа. Дийцарехь, Европерчу пачхьалкхашкахь Шайтановца маситтазза цхьаьнакхетта Егоров, тIаьххьара гина и шиъ вовшашна Германехь кху беттан Чиллан-баттахь.

КХИН А ХЬАЖА:

Хангошвили верца ФСБ-н зIе хиларх лаьцна шен таллам арахецна Bellingcat-о

Bellingcat-ан талламо бахарехь, Егоров тIаьххьарчу шерашкахь Европехула леларо могуьйту иза Нохчийчуьра схьабевллачу наханна дуьхьал «болхбеш» а хилла ала. Bellingcat-о дагадоуьйту Берлинехь Хангошвили Зеламха вер а, цунна куьгбехкениг ФСБ ю ала тарлуш хилар а.

Бинчу талламо чIагIдарехь, Германерчу Iедална хууш хилла Егоров рогIехь шайн пачхьалкхе дIабахначу Зазадоккху-баттахь ван везаш вуйла, кечделла хилла иза лаца, амма вукхо шен Iалашо юхаяьккхина – хууш дац, коронавирус яржарца доьзна юхаваьлла иза, я ша лацарна кхеравелла.

Bellingcat-о шена "Эльбрус" Егоров вуйла шо хьалха хиина, боху, амма ца дуьйцу, муха хиира.

КХИН А ХЬАЖА:

Берлинехь Хангошвили верна Оьрсийчоьнна санкцеш кхайкхо мега немцойн Iедалша

Bellingcat тобано хан хьалха теллира Британехь Скрипаль Сергейна а, цуьнан йоIанна а дIовш далар, билгалбехира царна зулам динарш (церан информаци бакъ хилар гира Британино таллам бинчул тIаьхьа). Оцу тобан талламо гойту "Боинг" дохорца йолчу къайленна а иза тIаьхьакхиа гена йоцийла.

ХIинца араевллачу Bellingcat-ан материалашна комментари янза ю Оьрсийчоьнан ФСБ.