ТIекхочийла долу линкаш

ЦIеххьана кхаьчна хаам!

Сулейманов Юсуп. Шен дуьхьа вехачуьнга


please wait

No media source currently available

0:00 0:00:51 0:00
Линкана тIе

Шен дуьхьа вехачуьнга

Адамийн хьашташна къахьега хIуьттуш.
Йоккхачу говзаллехь гIаланаш юттуш.
Масане, пхьераш дуьненчохь баьхна.
Со царна хастамбеш хьоьжуш ву тахна.


Вукхара тIаьш дина нуьцкъала, онда,
Лелийта царна тIех дахаран ворда.
Уьш дагахь латтабо адамаша хIинца,
ХIиттарца церан некъ баркаллехь бийца.

Аз сирла, говза дош ойланца лоьхуш,
Наб, хало эшийна шен къолам хьоькхуш.
Поэт а даггара къахьоьгуш воллу.
Ткъа цо а шен иллеш халкъана лору.

Халкъана лерина цхьа совгIат доцуш,
Хаставеш хьахорца яккха цIе йоцуш,
Хьо велла дIавевр ву, ца хилча санна,
Темаш ахь лехарна цхьана хьайн дагна.

Сулейманов Юсуп

Нохчийн поэт Юсуп Сулейманов вина 1933-у шарахь 21 августехь Дишни–Веданан вахархочун Чуьрчин доьзалехь.

Бер хенахь къаьстинера Юсуп дех-ненах. ЦхьайтталгIа шо дара цуьнан, "халкъан мостагI» ву аьлла цIе а тиллина, декъазчу шен халкъаца махках воккхучу дийнахь. Кзыл-Ордан Джалагашан кIоштарчу Кокжидзе юьртахь дIаяхана цуьнан кхийолу хан. ФЗО-хь деша а доьшуш, Карагандан шахтехь болх бина. Сулеймановс.

Лаккхара деша аьтто ца хиллехь а, дахаро деллера цунна шен Iилма а, байтанчан похIма а. Вай цIадирзинчул тIаьхьа «Колхозан дахар» газетехь болх бина Cулеймановс. Байташ зорбане евлла газеташкахь а, «Лаьмнийн иллеш» цIе йолчу цуьнан поэин гуларехь а, "Къоналлин кхайкхамца", "Iуьйренан аьзнаш", "Вуьссур вац со новкъахь" цIе йолчу юкъарчу сборникаш тIехь а, ткъа иштта "Орга" альманахехь а.

Юьртахоша дийцарехь, Юсуп чIогIа говза вара стоьмийн синтарш кхиорехь. Дукха ду цо дийгIина синтарш Веданарчу бахархойн стоьмийн бошмашкахь. Уьш а лаьттар ду, стом луш, цуьнан стихаш ешначу хIоранна а поэзин бешо лун стом санна.

Поэт кхелхина 1985-чу шарахь Дечкен-беттан ( январь) 10-чу дийнахь.

Оха хьоьхург

XS
SM
MD
LG