Американ Цхьаьнатоьхначу Штатийн а федералан махбаран комиссино а, 46 штатан прокурораша а, кхин а шина кIошто а лехам айина Facebook-на дуьхьал иза бехке еш, кокуренташ охьатаIорна а, монополина дуьхьал низам дохарна а.
Регуляторша бинчу хаамехь дуьйцуш ду, Facebook бакъо йоцуш шен монополи латтош ю социалан машанашкахь, кхиаме хила мега конкурташ а оьцуш.
Федералан махбарехула комиссино дехар дина кхеле Facebook-на тIедожадахьара аьлла, Instagram а, WhatsApp а йохкар а, тIейогIучу хенахь оцу кепара махбеш шайгара пурба дехийтахьара а аьлла.
Facebook-ан векалша дIахьедина, кхиаме болх беш йолчу бизнесна таIзар деш ду Iедал аьлла, масийтта шо хьалха оццу Федералан комиссино Instagram а, WhatsApp а эца шайна бакъо елла хилар дага а доуьйтуш. Цара дийцарехь, компанино миллионаш долларш инвестицеш йина и сервисаш кхиаме хилийта. Facebook ша бакъхилар гайта дагахь ю кхелехь.
- Facebook – уггар боккха социалан маша бу кху дуьнентIехь, шех пайда оьцуш 2,7 миллиард стаг а волуш. Рынкехь цуьнан мах бу 800 миллиард доллар, ткъа компанин инарла директор Цукерберг Марк ву уггар хьал долчу 5-а стагана юкъахь.
