Нохчийчоьнан куьйгалхочо Кадыров Рамзана Соьлжа-ГIалин мэран дарже шен дешичин кIентан, 30 шо долчу Кадыров Хас-Мохьмадан кандидатура кховдийна. Хьалха иза вара республикан куьйгалхочун а, Iедалан а администрацин куьйгалхо.
Кадыров Хас-Мохьмадах мукъадолучу дарже хIоттош ву экономикан, территори кхиоран а, йохк-эцаран а министр Iийна Таймасханов Галас, хаам бина Зазкдоккху-беттан 1-чу дийнахь мехкан куьйгалхочун пресс-векалто.
Даржехь хийцина Кадыров Рамзанан шича, Шелан кIоштан куьйгалхо лаьттина Ибрагимов Турпал-Iела а. Иза хIоттийна Таймасхановн хьалхара гIовс.
Таймасхановн шолгIа гIовс хир Соьлжа-ГIалин мэр Iийна Хаджимурадов Iийса.
Мукъадаьлла Шелан кIоштан куьйгалхочун дарж делла Айдамиров Руслане – Соьлжа-ГIаларчу Шайх Мансуран кIоштан префект вара иза.
- Нохчийчоьнан куьйгалхочун а, Iедалан а администраторан дарж Кадыров Хас-Мохьмаде делира 2020 шеран Лахьан-баттахь. Цул хьалха иза вара махкарчу Кхерамзаллин кхеташонан коьртехь, 2019 шарахь Iийна Устрада-ГIалин мэран даржехь, шен 26 шо долуш, 2017 шарахь, цунах вира Соьлжа-ГIалин полицин буьйранча.
- Лаккхара даржашка хаийна мехкан куьйгалхочун ши йоI а. 2020 шарахь 21 шо долу Iайшат хIоттийра синбахамаллин министран хьалхара гIовс, 20 шо долчу Хадижате елла махкарчу берийн бошшамийн департамент.
- Кадыров Рамзана тIеэцна кIант Кадыров Висита 2020 шеран гурахь хIоттийра Роспотребнадзоран Нохчийчуьрчу декъан куьйгалхочун гIовс.
- Шо хьалха Кадыровс, мехкан лаккхара даржаш цо шен доьзалхошка стенна ло, аьлла хаьттича делла жоп иштта дара: "Суна эхь ца хета, ас сайн къомах, республиках жоп ло, со оцу тIехь ларавеш хилча, хIун бен ду мила хуьлу министр, кIоштан, администрацин я министрийн кабинетан куьйгалхо? Цунах ас са ца гатдо".