Навальный Алексей 2,5 шарна набахте хьажош кхелахоша бина сацам нийса бу аьлла 48 процент пачхьалкхан бахархоша.
Ткъа 29 проценто харцо лору. Кхин а 23 процент жоп дала ца хIоьттина.
Ишта ду "Левада-центро" (Оьрсийчохь "арахьара агент" лерина) бинчу талламан жамIаш.
Зазадокху-бутт бовш "Открытые медиа" хьостаца юкъахь вовшахтоьхнера центро шайн талламан хеттарш.
Динчу жамIашца а догIуш, кхел харцонца йина ю аьлла хета Москварчу а, яккхийчу гIаланашкахь а, ярташкахь а бехачу кегийчу нахана. 18-22 шераш долчу бахархошлахь кхелан сацамна реза боцучийн процент 50-не кхаьчна.
Кегийчу а, юккъерчу барамашкахь а йолчу гIаланашкара нах кхелах теша - суьдхойн вердикт нийса дара аьлла хетарш 52 проценте кхочу цигахь.
Оцу юкъанна, Навальный мел а сиха набахтера араваккха луурш 61 процент бу, кхелан сацам харц хетачарлахь.
Навальный чохь вита веза аьлла хетарш 8 процент бу "Левада-центран" зерашца.
Политологна Галямов Iаббазна хетарехь, дог лозучарлахь 29 процент хилар - Iаламат лакхара терахь ду. Цо лелочунна 20 процент бахархой бен реза цахиларе хьаьжча, къаьсттина лакхара ду и терахь.
Кремло масийттазза дIахьедира, Навальный Путин Владимирна кхераме оппонент ца хета шайна аьлла.
Доккхачу декъанна ВЦИОМ-о (Оьрсийчуьра юкъараллина хетарг толлу центр) бинчу талламна тIетуьйжура Iедалхой, ткъа церан зерашца Навальныйн рейтинг шина проценте а ца долура.
Навальныйна бехке дуьллуш ду Ив-Роше компанин 30 миллион сом ахча лачкъор. Прокуроро дехнера Навальный Алексейна -10, цуьнан вешина Олегана 8 шераш хаенаш тохар. Эххар а ши шой ах шой хан кхачийра Навальный Алексейна.
Навальныйна гIортор еш митингаш хIиттийра Оьрсийчоьнан дуккха а гIаланашкахь. Навальный Алексей Оьрсийчоьнан хир волу президент ву аьлла хета дуккха а нахана.
Зазадоккху-беттан 31-чохь шена тIе лор витар тIе а дожош, мацалла кхайкхира Навальныйс колонехь. Политико латкъамаш бо, шен букъехь лаьтта лазар когашка дирзина, наб яйна а ву ша бохуш. ФСИН-ан белхахоша дIахьедира, оьшуш мел долу лоьрийн гIо Навальныйна кхачош ду аьлла.
Зазадокху-беттан чакхенехь эзар сов Оьрисйчуьрчу медицинан белхахоша диллина кехат яздира, политикан тешам болу лоьраш цунна тIебитар тIедожош.