ТIекхочийла долу линкаш

ЦIеххьана кхаьчна хаам!

70 сов гIоьналлин организаци гIаьттина Навальный Алексейгахьа


Владимирскан кIоштара ИК-3 колони. Цу кертарчу дарбан цIийнехь ву Навальный Алексей.

Кхо кIира хьалха Владимирскан кIоштарчу колонехь мацалла кхайкхийначу Навальный Алексейна катоххий лоьраш тIебита аьлла, тIедожийна Оьрсийчуьрчу 70 сов гIоьналлин организацеша. Набахтера ара а ваккхий, иза дарбан цIийне охьавилла, цо билгалбаьхна лоьраш тIе а кхачийта, планехь доцу талламбар а дIахьо Владимирскан кIоштарчу набахтехь, федаралан таIзарш кхочушдаран урхаллера (ФСИН) схьа а эций, цунна дарба дар могушаллин министралле дIало аьлла, тIедожийна цара.

Кехатна куьйгаш яздинчарлахь бу - "Ночлежки" организацин куьйгалхо Свердлин Григорий а, "Подари жизнь" фонд йиллинарг а, цуьнан директор Хаматова Чулпан а, Шергова Екатерина а, "Дети-бабочки" фондан Iуналхо Раппопорт Ксения а, гIоьналлин Хабенский Константинан фондан директор Мешкова Елена а, "Нужна помощь" фондан кхеташонан куьйгалохо Алешковский Дмитрий а, "Дом с маяком" фонд йиллина Мониава Лида а.

Зазадокху-беттан 31-чохь дуьйна мацалло хьоьгуш ву Владимирскан кIоштарчу Покров гIаларчу ИК-2 колонехь латтош волу Навальный Алексей. Шен могушаллана латкъам бечу цо тIедожийна шена лоьраш тIебитар. ХIинццалц Навальныйн могушалла шайн тергонехь латтийначу лоьраша бахарехь, ледарчу хьолехь ву иза.

"Техка а техкаш, камера чухула дIасалелаш ю стеган даьӀахкаш", - яздина Навальныйс, шен адвокатехула инстаграме яккхийтинчу постехь.

Навальныйца солидаралла гойтуш, Оьрсийчуьрчу 100 гергга стага мацалла кхайкхийна. Орцах бевлла оппозиционерна дуккха а арахьарчу пачхьалкхашкара политикаш а, культурехь къахьоьгу нах а, шайлахь Нобелан лауреташ а, Голливудера артисташ а цхьана болуш. Цара массара а доьху Путин Владимире, Навальныйна тIе лоьраш битар.

Охан-беттан 19-чохь ФСИН-о дIахьедира, Владимирерчу ИК-3 колонерчу дарбан цIийне дехьаваьккхина Навальный, аьлла.
Хаамийн гIирсаша "Iазапан" колони ю боху иза.

Хьалхо ФСИН-н белхахоша кхерамаш тийсинера Навальныйна, шаьш бертаза хIума яаор ю хьуна аьлла.

Оцу юкъанна Навальныйн агIончаша йоллу пачхьалкхехь митингаш кхайкхийна Охан-беттан 21-чохь. Оцу дийнахь Федералан гуламе шен рогIера дIахьедар дийр ду Путин Владимира.

Нагахь санна, нах митинге бовлахь, къепе йохорна шаьш бехкзуламан гIуллакхаш дохур ду дуьхьал аьлла, дIахьедина Оьрсийчоьнан Инарла прокуратуро а, чоьхьарчу гIуллакхийн министралло а

Коьрта теманаш

Оха хьоьхург

XS
SM
MD
LG